15. МАЙ – На нєшкайши дзень урядово почала робиц Новинска аґенция по руски Рутенпрес.
1763 – Подписани контракт о насельованю Руснацох до Коцура. Коморски администратор Редл де Ротенгаузен видал контракт Петрови Кишови зоз хторим дошлєбодзене же би ше 150 фамелиї зоз сиверней Угорскей преселєли до Коцура.
1859 – Народзел ше французки физичар и хемичар Пєр Кири (Париз, Французка, 15. май 1859 – Париз, 19. април 1906). Зоз супругу Марию Кири-Склодовску и французким физичаром Антоаном Анрийом Бекерелом 1903. року подзелєл Нобелову награду за физику. Преучовал маґнетни зявеня, а зоз супругу пренашол радиоактивни елементи полониюм и радиюм.
1928 – Приказани рисовани филм „Плейн крейзи”, у хторим ше першираз зявел Мики Маус.
1945 – Югославия цалком ошлєбодзена од окупатора и єдинки Югославянскей армиї зламали и остатнє орґанизоване одуперанє нєприятельских моцох у Другей шветовей войни.
2006 – Урядово почала робиц Новинска аґенция по руски Рутенпрес. Аґенция Рутенпрес урядово реґистрована як порядна дїялносц НВУ Руске слово Нови Сад, и за тераз є перша и єдина така новинска аґенция на меншинских язикох у Войводини и Сербиї.
2014 – Циклон Тамара залапел Балканске полуострово и пре вецейдньови моцни диждж и вилїви рикох у Сербиї 2 городи и 17 општини (Шабац, Сримска Митровица, и општини Обреновац, Лїґ, Уб, Лайковац, Осечина, Парачин, Мионица, Свилайнац, Смедеревска Паланка, Шид, Трстеник, Косєрич, Баїна Башта, Крупань, Мали Зворник, Коцелєва и Владимирци) преглашели позарядову ситуацию. Водостой рикох Дунай и Сава почал ше зменшовац од 25. мая. Настрадали 57 особи.
Нєшка Медзинародни дзень фамелиї. Преглашела го Ґенерална скупштина Орґанизациї зєдинєних нацийох 1993. року.
Медзинародни дзень процив климатских пременкох (International Climate Action Day).
Дзень борби процив малиґних меланомох скори.