8. ЮНИЙ – На нєшкайши дзень народзени поета Силвестер Ерделї и Юлиян Арва.
1810 – Народзел ше композитор и музични писатель Роберт Александер Шуман (Цвикау, 8. юний 1810 — Бон, 29. юлий 1856) представнїк романтизму у музики.
1867 – Народзел ше архитект Френк Лойд Райт (Ричленд Сентер, ЗАД, 8. юний 1867 – Феникс, ЗАД, 9. април 1959), єден зоз творцох модерней функционалней архитектури, дизайнер ентериєру.
1916 – Народзел ше биохемичар Френсис Хенри Комптон Крик (Вестон Фавел, УК, 8. юний 1916 – Сан Диєґо, ЗАД 28. юлий 2004), добитнїк Нобеловей награди за медицину 1962. року.
1930 – Народзел ше Силвестер Ерделї (Петровци, 8. юний 1930 – Петровци, 19. авґуст 1996), визначни културно просвитни роботнїк, поета, зазберовач народного скарбу. Почал писац ище 50-тих рокох и бул под уплївом поезиї яку писал Митро Надь. Силвестер Ерделї жил у Петровцох дзе бул член КУД Яким Гарди, руководитель читальнї, порушовач велїх културних акцийох и їх реализатор, дописователь новинох Руске слово, заступнїк виданьох Новинско-видавтельней установи Руске слово у валалє. Вон иницирал же би ше у Петровцох оформело музейну збирку хтора преросла до музейней вистави, а фахово ю обробели фаховци музею з Вуковару. Руске слово видало зборнїк його писньох У лєшику при валалє, а писнї му обявйовани у народних календарох и Литературнм слове. Силвестер Ерделї умар 19. авґуста 1996. року.
1950 – Народзел ше доаєн рецитаторского руху, ґлумец и поета Юлиян Арва (Руски Керестур, 8. юний 1950 – Руски Керестур, 24. януар 2024). Юлин Арва бул виучени за шлосера, а у души бул рецитатор, поета, ґлумец, любитель крашнє виповедзеного слова и уметносци. Участвовал на першей смотри рецитаторох у валалє, котра була орґанизована 1969. року. Окрем на месней участвовал и на општинскей, покраїнскей, а потим и на републичней смотри у Велькей Плани. У финалу вєдно зоз нїм рецитовал и Александар Берчек, наш познати ґлумец. Попри рецитованя и ґлумел, та и режирал. Юлиян Арва поховани на керестурским теметове 25. януара 2024. року.