РУСКИ КЕРЕСТУР – У орґанизациї Фодбалского клубу „Русинˮ, всоботу 20. януара, отримани ище єден „Русинов балˮ, у ресторану „Бостонˮ, у Руским Керестуре, а як гварели орґанизаторе, бул то єден з найвеселших и найнащивенших Русинових балох.
По традициї, на балу додзелєни даскельо припознаня и подзекованя, та за найлєпшого бавяча преглашени Деян Павлович, титулу найлєпшей навияцкей пари достали Тобияс Шанта и Кристина Чизмар, а окремне подзекованє достал Александар Кочиш Берґо за вецейрочни допринос клубу Русин.
Припознаня додзельовал секретар Клубу Желько Орос, хтори з тей нагоди и привитал присутних, терашнїх и бувших членох Клубу, як и бавячох Русину, тренерох и других числених госцох.
Тогорочни Русинов бал угосцел коло 170 любительох балованя и фодбалу. Окрем домашнїх, були и госци зоз коцурксей „Искриˮ и госци з Лалитю, а таку вельку нащивеносц и таку веселу атмосферу, за хтору бул задлужени „Еуро бендˮ зоз Лалитю, орґанизаторе, як гварели, нє паметаю.
Того вечара подзелєни прейґ 200 томболи у вредносци коло 3.000 евра, за хтори ше постарали орґанизаторе и числени спонзоре, привреднїки з валалу, а перши три главни награди були – телевизор, хтори подаровал клуб Русин, потим три ноценя на Златибору, а треценаградзеним припаднул мебель.
Шицки три главни награди остали у Керестуре.
