ДЮРДЇН – У першим бараж стретнуцу, за пополньованє Войводянскей лиґи – ґрупа Сивер, хторе одбавене внєдзелю, 18. юния у Дюрдїну, Фодбалски клуб Русин прецерпел пораженє у остатнїх минутох stretnuca од екипи Дюрдїну зоз 2:1 (1:1).
Бараж стретнуце, медзи Дюрдїном и Русином виполнєло шицки обчекованя и прешло у квалитетним и динамичним фодбалу, пред скоро 1.000 патрачами, хтори по красней хвилї пришли потримац свою екипу.
Русин тото стретнуце отворел дакус лєпше, мал частейше лабду у ногох и баржей грожел на ґол домашнїх. Так после даскельо нагоди на обидвох бокох, єдна пререзана лабда доходзи до Вуйовича хтори зоз пол терена зоз прецизним додаваньом до глїбини находзи младого Саянковича, хтори сцека охрани Дюрдїну и дриля лабду коло ґолмана домашнєй екипи. У 28. минути Русин водзи зоз 1:0.
Радосц русиновцох не тирвала длуго, понеже лєм о три минути, точнєйше у 31. минути екипа Дюрдїну виєдначує резултат на 1:1. После того ґолу, домашнї превжали инициятиву и направели вецей нагоди, медзитим нє були опасни по ґол Керестурцох и на полчасу резултат остал нєришени.
У другим полчасу тиж видзени добри и квалитетни фодбал, нагоди було на обидвох бокох, алє мрежи мировали. Як ше ишло ґу концу стретнуца и кед ше уж думало же ше стретнуце закончи зоз нєришеним резултатом, домашнї бавяч ше у 90. минути остарал же би побида од 2:1 остала у Дюрдїну.
Треба надпомнуц же на тим стретнуцу Андрей Малацко чежше покалїчени, зламана му косц под оком.
Русин бавел у составе – Деян Кронич, Стефан Тома, Боян Голик (C), Александар Кочиш, Деян Павлович, Филип Вуйович, Деян Чернок (Никола Циврич), Янко Кулич, Оґнєн Маркович, Матей Саянкович, Андрей Малацко (Александар Тома). Ґол за Русин дал Матей Саянкович.
Реванш бараж стретнуца будзе ше бавиц на штварток, 22. юния на Ярашу у Руским Керестуре, кед екипа Русину пробує пред полнима трибинами Керестурцох надополнїц страцени боди у Дюрдїну, и пласовац ше до Войводянскей лиґи Сивер.
