Одмалючка глєда камень мудросци

автор Я. Дюранїн
103 Опатрене

Кед сом першираз видзела дзевецрочну Леу Ранкович зоз Нового Саду, такой сом подумала же ма у себе цошка специфичне. Кед сом ю лєпше упознала, зрозумела сом же є барз интелиґентне, шмеле, любопитлїве и барз дружелюбиве дзивче

Ростом нєвелька, длугоки лєм цо нє помаранчецово власи, бисти попатрунок и ноги хтори нє мирую була перша слика хтора ми ше створела пред очми кед сом ше стретла зоз Леу Ранкович. Пришла до просторийох „Руского слова”, на дакедишнє мацерово роботне место. Док єй мама Анамария була директорка Заводу за културу войводянских Руснацох, и Леа часто ту приходзела на рижни роботнї за дзеци. Гоч теди була ище мала, накадзи ше прешейтала по шицких просторийох, велїх стварох ше поздогадовала. И то нас такой наведло на приповедку о єдней теми котру вона у остатнїм чаше барз люби. А то правенє бависка Сцекнї зоз хижи (Escape room). Приповеда Леа же кед бул Дзень босоркох, такволани Геловин, вона направела тото бависко та вєдно зоз своїма пайташками ришовали задатки и шифри же би нашли ключ котри им помогнє же би „сцекли зоз хижи”. А на питанє же як мож направиц тото бависко, Леа толкує:

–Перше мушим добре обдумац тему, наприклад „Хари Потер хижа”. бавидко може буц у єдней просториї, а може буц и у вецей. Кед ши у вецей, вец за кажду просторию правиш план як треба висц зоз нєй. Треба ришиц задаток и пренайсц шифру, лєбо даяки шлїд, опатраш шкатули, замчки, а кед пренайдзеш єден шлїд, отвориш го и ришиш, вец достанєш ключ и шлїдуюци шлїд зоз задатком. И так идзеш док нє видзеш зоз просториї – толкує креаторка Леа.

Леа ма вельо пайташки у своїм сушедстве зоз хторима ше стално бави, а ходза и до истей школи, „Милош Црнянски”, гоч нє до истого оддзелєня. През розпуст маю вецей часу, та вєдно препровадзую шлєбодни час.

Нє треба забуц анї єй мачку, Мию, котру у ствари волаю Шиза, бо ше вшадзи пендра и бега як без глави.

Радио у „Заградки”

Дзецинску емисию за дзеци, котра ше емитує каждей соботи на 12,30 годзин, пририхтує Леова мама, та ше часто радзела зоз ню о змисту. Леа єй вше погуторела свойо думанє о даєдней теми, та през бешеду обдумовали цо би дзецом було интересантне слухац. Так, кус по кус, Леа була уключена до емисиї. Часто и шедзи у студию, цо ше єй барз пачи.

–Нє мам трему од микрофона, а анї од публики. Вше вєдно з маму роздумуєме о теми и у самей емисиї бешедуєме о тим, алє вше напишеме на папер. А вец здумаме и як би то могло написац до „Заградки”, та так настава и тот бок – бешедує нам Леа.

Трему нє мала анї на „Пахульки”, бо пред тим уж участвовала на Дньох Миколи М. Кочиша. На манифестациї вєдно зоз своїма парняками шпивала и у хору.

Свою креативносц Леа указує и през рисованє. Барз люби рисовац портрети, зоз клайбасом, а дакеди ходзи и на годзини дзе уча як ше цо рисує. Гвари же єй то нє одбера вельо часу, бо то барз люби робиц. Мама ю часто водзи и на рижни роботнї дзе дзеци уча о вшелїяких наукових експериментох, цо єй тиж барз интересантне, бо є любопитлїва.

Леа люби и карате. Уж положела за помаранчецови пас.

–На каратеу учиш кати. Попаметала сом шицки кати за жовти и помаранчеви пас, а знам и тоти за червени и желєни. Одкеди сом прешла до старшей ґрупи, мушела сом попаметац шицко цо треба – гвари Леа.

На змаганя часто путую, а нєдавно у Темерину освоєла и перши погар. Гоч нє барз люби облєкац кимоно, якошик ше на ньго звикла.

Попри того шицкого, Леа ходзи и на английски язик, котри барз люби, часто бави и бависка на телефонох, бо то, як гвари, скоро шицки любя, алє од шицкого найволї Хария Потера. Шицки филми одпатрела и то нє лєм раз, зна як ше волаю подоби у филму, цо ше случує, яки єст мистериї и скоро шицки дробнїци зоз тих филмох. Кед роздумаме цо шицко тото дзивче зна и як розуми швет у хторим рошнє, з правом бизме поведли – Лара Ранкович и камень мудросци.

ПОВЯЗАНИ ТЕКСТИ