НОВИ САД – Прешлого тижня почало ше оправяц и билїц вельку салу у Руским културним центре.
Инициятиву порушали руководитель дзецинскей фолклорней ґрупи Милан Брекайло и Владимир Горняк, средства за реновиранє назберали члени Руского културного центру зоз власнима донациями и з помоцу спонзорох.
Роботи спонзоровали Бранко Печанац, хтори донирал фарби и материял за роботи, Фарбара „Или боя” донирала фарбу за ламперию и облаки, як и щетки и рольки, а Столария Мушицки зоз Дюрдьова донирала уходни дзвери.
Велька акция отримана всоботу 6. децембра кед ше салу першираз обилєло и офарбело облаки. До тераз, велька сала обилєна, оправена ламперия и офарбени облаки. Остало ище заменїц уходни дзвери до велькей сали, офарбиц ламперию, радиятори, поцагац електрични инсталациї и положиц ламинат.
Милан Брекайло за Рутенпрес гварел же вон и Владимир Горняк приходза кажди дзень до Матки после їх роботи и же ше кажди дзень одволаю и други члени, хтори помагаю у роботох. Намира им же би тот простор обновели, як би ше члени Руского културного центру у нїм приємнєйше чувствовали.
