РУСКИ КЕРЕСТУР – Крачунски концерт школярох Школи за основне музичне образованє (ШОМО) у Кули, видвоєного оддзелєня у Руским Керестуре, отримани вчера вечар у велькей сали Дома култури и бул крашнє нащивени.
Концерт отворел Хор младших школярох котри одшпивали два шпиванки, а потим ше 34-еро школяре представели з тим цо научели у першим полрочю, та публика могла чуц од класичних композицийох по народни и крачунски.
Представели ше школяре од першей по шесту класу котри у керестурским одделєню учa грац на клавиру, гармоники и тамбури прим и тамбури басприм, а штверо мали перши явни наступ – Стафани Чуни, Милица Джакула, Маша Ерделї и Матея Ґецан.
За наступ и през цали рок школярох пририхтовали їх наставнїки Мирон Сивч, Геленка Гарвильчак, Мирко Преґун, Ладислав Тамаши, а клавирски сотруднїк на вечаршим концерту була Кая Мандич Плавшич.
Крачунски концерт керестурского оддзелєня бул перши у сериї концертох кулскей музичней школи, котри ище буду отримани у Червинки, Кули и у Сивцу.
