ДЮРДЬОВ – У 14. колу Подручней фодбалскей лиґи Нови Сад, хторе одбавене 13. новембра, фодбалере ФК Бачка 1923 зоз Дюрдьова победзели у стретнуцу зоз фодбалерами Бачки зоз Беґечу, а поссцигнути резултат 6:2.
Перши ґол на стретнуцу посцигли фодбалере Бачки зоз Дюрдьова у 22. минути, алє госци уж у шлїдуюцей минути виєдначели резултат. Домашнїм ше поспишело же би дали ище єден ґол по конєц першого полчасу у 41. минути.
У другим полчаше дюрдьовски фодбалере бавели ище лєпше. На початку другого полчаса у 52. минути, посцигли треци ґол, а нєодлуга у 6. минути и свой штварти ґол. Теди ше уз могло нагаднуц хто побиднїк на тим стретнуцу, алє ше чекало конєц же би ше Дюрдьовчанє могли радовац ище єдней побиди.
Госцом ше удало у 76. минути дац други ґол на тим стретнуцу, алє то им нїяк нє було досц за побиду. При концу стретнуца, у цеку штири минути домашнї посцигли ище два ґоли. Ненад Дюрич схопно копнул до лабди и посцигнул пияти ґол за домашнїх у 86. минути, а на концу стретнуца у 90. минути, Милан Роґич посцигнул свой други ґол и остатнї на стретнуцу.
После того кола Бачка ище вше на пиятим месце на таблїчки зоз двацец шейсц боди. У шлїдуюцим колу дюрдьовских фодбалерох чека остатнє стретнуце у єшенскей часци першенства зоз фодбалерами Єдинства у Ґосподїнцох.