ПАРАҐЕ – У 2. колу Подручней лиґи Зомбор, внєдзелю 20. авґуста, фодбалере Русина госцовали у Параґох дзе одбавели стретнуце процив домашнєй екипи Будучносци, од хторей страцели зоз резултатом 3:1 (1:0). Ґол за Русин дал Небойша Заґорчич.
У першим полчасу бависко ше одвивало углавним на штредку терена, зоз даскелїма нагодами за ґол. Кед ше обчековало же ше перши полчас закончи зоз нєришеним резултатом, на страцену лабду Русиновцох рушел контранапад домашнїх бавячох, после хторого, у 47 минути, дали ґол и на одпочивок ше пошло зоз резултатом 1:0 за домашнїх.
У другим полчасу видзена иста слика, та так после одбавених даскельо минутох, после фаула хтори направели Русиново бавяче на 20 метерох, на лабду набегує домашнї бавяч и зоз главу дава ґол и у 50. минути звекшує резултат на 2:0.
Домашня екипа Будучносци, зоз добрим бависком дошла и до трецого ґолу, кед после корнеру, на перши попатрунок нє опасней ситуациї по ґол Русина, алє направени даскельо гришки и то допринєсло же би екипа зоз Параґох у 69. минуту звекшала на нєдосцигуюци резултат од 3:0. После того ґолу домашнї дакус станули на лабду, чували ю баржей у ногох, а на самим концу змаганя Русин дал ґол и зменшал резултат на 3:1, цо бул и конєчни резултат на тим стретнуцу.
Русин бавел у составе – Михайло Надь, Стефан Тома (Александар Тома), Боян Голик, Александар Кочиш (Марио Иличич), Деян Павлович, Неманя Муминович, Стефан Мароєвич, Матей Саянкович, Небойша Заґорчич, Небойша Попович (Андрей Дудаш), Деян Чернок.
На нєдзелю, 27. авґуста, у 3. колу Русин на своїм терену дочекує екипу Полет зоз Каравукова, а стретнуце почина на 16:30 годзин.