Вєшенї 2023. року кед ше случел напад Хамасу на музични фестивал при Кибуц Реиму, а фашистична держава Израїл врацела зоз таку силу же отворена обтужнїца за ґеноцид над Палестинцами пред Медзинародним судом, праве тей єшенї окляпла потримовка України. И тераз, два роки потим, остатнї мировни план понукнути України – творенє нїчиєй жеми. Точнєйше, творенє доброго фалата жеми над котру Україна нє будзе компетентна, кобояґи нє була би анї Русия, а сиґурно же би була под компетенцию америцкого капиталу. Нє свойого, алє того америцкого капиталу котри приноши профит и Доналдови Трампови, безкрупулузному муфлюзови котри на чолє єдней зоз шветових силох. Шветовей сили котра препада, алє ище досц моцней же би нам шицким оґадзела живот.
Та так, америцки муфлюз, правоориєнтовани (Трамп), прегваря зоз русийским муфлюзом, правоориєнтованим (Путином), же би вєдно (бо су векши и моцнєйши) склонєли зоз сцени українского муфлюза, правоориєнтованого (Зеленского), и европску шарлатанку правоориєнтовану (фон дер Лаєн), бо тоти двойо остатнї менши и слаби. Значи, то єдна поєдноставена шема одношеньох, алє су шицки свойо – правоориєнтовани. Тиж так, без розликох, муфлюзове и шарлатанє. И гей, и на чолє Сербиї муфлюз и шарлатан, як цо таки особи на чолє велїх державох.
Углавним, швет весело правоориєнтовани, муфлюзове и „дрипци” нам одредзую животи, забиваю на Жемовей кулї як ше им сце, меняю закони як ше им сце, и вообще, кед би нє було инфраструктури 21. вику (водовод, канализация, електро-дистрибуция и интернет), чловек би ше могол зарекнуц же зме у епохи после паду Римского царства котру наволуєме цми штреднї вик. Правда, анї модерна епоха ше нїґда нє ускладзела зоз идеями просвитительства.
Углавним, тота прицагуюцосц политично правоориєнтованих, їх кич-идеолоґия штрасу, позлаценосци и шицкого цо ше блїщи, указує на їх глїбоку инфантилносц. Источашнє як тота инфантилносц прикрашує одроснутих людзох, и то на положеньох, указує шицок ужас котри нєдозрета особа зоз политичнима правами и политичну моцу може принєсц швету. Политично правоориєнтовани котри зоз собу ноша високо дзвигнуту заставу релиґиї (нєважне чи то юдеїзем и його два найвекши секти – християнство и ислам, лєбо поганство – гиндуизем и будизем) котри нїґда нє можу розумиц єдинку, бо су нєдозрети и нєодроснути, и ище вше є МИ (зоз родичами, богами, нацию и расу), и нїяк даяке Я. Политично правоориєнтовани то людзе котри занавше остали у страхох дзецка предшколского возросту котри ше єднак боя и мержа родичох, богох, державу, нацию, як цо праве од родичох (богох, держави, нациї, раси) обчекую спашенє.
Нє даяка велька потїха же правоориєнтовани и фашисти то нєдозрети, нєодроснути, нєавтономни людзе. То факт котри ище раз потвердзує нужносц образованя. Секуларного образованя.