РУСКИ КЕРЕСТУР – У рамикох Жимскей школи, землєдїлска задруґа „Аґроплус”, котра у сотруднїцтве зоз ище трома компаниями, 26. януара у погосцительним обєкту „Чарда Лонґов” у Руским Керестуре, орґанизовала шесту презентацию за польопривреднїкох.
Презентациї орґанизовани з цильом превозиходзеня проблемох у польодїлскей продукциї, запровадзованя иновацийох и звладованя нєoчекованих ситуацийох до котрих приходзи каждей сезони.
У тих компанийох заняти образовани фаховци котри ше занїмаю з польопривреду и стретаю з рижнима проблемами на терену.
Славко Малацко привитал присутних, надпомнул и замодлєл шицких же най нє буду стримани, и най ше шлєбодно интересую за шицко цо их интересує, най подзеля свойо проблеми и искуства з котрима ше стретаю.
На презентациї, свойо продукти и искуства у польопривреди представели компаниї „Аgrosava”, „Elixir Zorka”, и Институт за кукурицу „Zemun polje”, а у шлїдуюцим периодзе приду ище рижни компаниї котри буду бешедовац о защити рошлїнох, превозиходзеню дотерашнїх проблемох, уводзеню иновацийох и подобне.
