Одкеди Руски Керестур достал Спорску галу, як гваря домашнї, храм спорту, єст места и идеални условия за велї спортски и рекреативни активносци шицких ґенерацийох. Уж треци рок там активно тренираю и жени у ґрупи котра наволана Рекреация за жени, а водзи ю Лїляна Еделински. Нєшка у ґрупи єст коло 50 жени и дзивки од 20 по 80 роки живота
О тим як шицко почало и як ше розвивало, бешедовали зме зоз Лїляну. – Почало барз нєобично. Ходзела сом до ґрупи Маї Гардийовей ткв. Фитнес валк, котра и нєшка активна. Пре свойо здравє надумала сом ше ґу нїм придружиц и шицко було добре, алє думам же то баржей за младших. Пре свойо здравствени проблеми нє могла сом витримац їх темпо.
Надумала сом сама пробовац вежбац зоз такима, по рокох, як и я, и на початку нас було коло 12 жени старши од штерацец рокох. Як сом ходзела на тренинґи, видзели ме сушеди, та ше ми вше питали дзе идзем, и чи єст дацо и за старших. Tак сом надумала же пробуєм з нїма тренирац, та увидзиме чи то потирва. Зоз спомнуту старшу ґрупу почали зме о рок, и то ше барз добре указало – поздогадовала ше наша собешеднїца.
Тренирало ше у гали у двох терминох, три раз до тижня, пондзелок, стреду и пияток, а два ґрупи. Кед ше о тим пречуло, почало ше звекшовац число женох, указала ше потреба и за трецу ґрупу.
– Тераз маме три термини и три ґрупи у хторих динамика вежбох нє иста, интензивнєйши и спомалшенши темпо, два ґрупи маю по годзину тренинґ, а треца 40 минути, и так мож виберац кому цо одвитує – толкує Лїляна.
ТАК ВИПАТРАЮ ТРЕНИНҐИ
– Вельо ми помогла наша бувша рукометна репрезентативка Злата Паплацко у порадох коло вежбох, а и я сама роками була у тим спорту. Перше маме вежби нацагованя, зогриванє, помалши, вец швидши темпо, и на концу вежби долу на подлогох за вежбанє. Хаснуєме и рижни реквизити як кульки, палїци, пантлїки, лабди, подлоги за вежбанє. И шицко зоз музику котра прилагодзена реквизитом, темпу и часцом тренинґу, а и ґу женом и їх розположеню. Я ше досц пририхтуєм за кажди тренинґ, раз зме рокерки, раз у диско ритму, други раз зме на морю –дознаваме од Еделинсковей хтора наглашує же жени физично барз активни и дисциплиновани, за нїх нєт препреченя як цо диждж, шнїг, же су вистати, або же термин нє одвитує. Векшина поряднє приходзи, а тото цо ше женом пачи то же и Лїля флексибилна, окреме при самим тренираню, та роби хто цо и кельо може. Вона вше надпомина – слухац цело кельо допущи же би ше поробело даяку вежбу. Очиглядно же жени чувствую бенефити того шицкого и прето их и єст вше вецей. Як гвари Еделинскова– дзвери шицким отворени.
Рекреативки потримали и два Явни тренинґи на керестурским базену котри орґанизовала Мая Гардийова, а у октобру прешлого року мали свой вельки заєднїцки тренинґ у велькей гали, вєдно шицки три ґрупи, алє у ширшим составе. Вежбац були и дакедишнї рекреативки, и унучата, були и госцински, як цо др Златана Надь котра ше приключела ґу тренинґу и похвалєла же то барз добра активносц. Шветова шампионка Илона Зарубица тиж, а потримал их и Юарбис, бо подаровали яблука за тоту нагоду.
ПОЧАЛИ И ДРУЖЕНЯ
Водителька Лїляна наглашує же Рекреация за жени постала як єдна велька фамелия:
– Патриме ше шицки и потримовац, та вєдно означуєме и приємни дожица и жалосни, родзени днї итд…У сали дзе вежбаме означовали зме з друженями и швета як цо Нови рок, або Осми марец, а понеже сом видзела же женом тото дружтвованє барз значи, алє и прето же заслужели, влонї сом надумала орґанизовац и друженє-бал рекреативкох. Прешлого року то було у меншим просторе, було нас менєй, а того року зме бал отримали у векшим же би шицки мали места. Попри рекреативкох було и госцински з валалу – гвари вона.
Як заключела, тренинґи шицким приноша нє лєм физични и здравствени хасен, алє и психичне опущенє и розтерхованє од каждоньових обовязкох, бриґох и чежкосцох. Гоч почало з малим цильом помогнуц себе, розвило ше до велькей активносци. Лїляна свидома же роби цошка добре и хасновите.
– Попри психофизичних бенефитох тих тренинґох, поготов за старши або самотни жени, то и тоти нашо друженя, же су ознова дзешка звонка дому активни, прилапени. Понеже и я дакеди була рукометашка, а штредню школу мам закончену як орґанизатор културних активносцох, анї сом нє шнїла же у моїм 50-им року на таки способ придзе до вираженя и мойо занїманє. Тиж ми барз мило же можем дац шицко од себе же бим прилапела жени з валалу дзе наисце єст потреба за таким дачим и думам же им на тот способ помагам. Полне ми шерцо и виполнює ме тота робота. Кед на тренинґу станєм опрез нїх и кед их видзим як уживаю, то ме тиж мотивує же бим озбильно робела и так и надалєй предлужела.
ПОПАЧЕЛИ ШЕ ИМ И ВИЛЄТИ
Сезона тренинґох тирва од септембра по юлий, а влонї при концу сезони жени ше ми опитали, же цо будземе през лєто робиц.
Од слова до слова, чули вони за добру купель або баню у Пачиру. Орґанизовали зме ше и першираз там були 20 жени, а нєодлуга одходзиме до Юнакович банї… Попачело ше женом, чули же єст добри купелї и за гранїцу, та сом ше розпитала. Так почало сотруднїцтво зоз Титель-превозом котри нам тераз за бал аж и два путованя подаровал. Предложели нам вилєт до Морахалом банї, назберали ше 39, вец до Мако банї ше назберало 51, а були з нами и жени з Нового Саду и Оджаку. Пред Новим роком були зме у Будапешту. И гоч уж и тренинґи маме, одлучене же кажди мешац пойдземе на вилєт. У марцу ше збераме на Фрушку гору привитац яр – гвари Лїляна Еделинскова.
РОКИ НЄ ВАЖНИ, ШИЦКИ УЖИВАЮ
Же рекреативки наисце уживаю велї пошведочели, а призначели зме вияву наймладшей, Анастазиї Романовей.
– Рекреацию препоручуєм каждому. Пре нєшкайши способ живота то найменєй цо можеме подаровац свойому целу, алє и психи. То треба дожиц и почувствовац. Дзекуєм Лїлї на сцерпезлївосци, на орґанизациї…
Мария Рацова з першима почала тренирац и гвари же єй барз пасира и же ше барз добре чувствує кед ше понацагує и презної, а тото цо барз добре, то же ю и колєно престало болїц. Вежба тельо кельо цело дошлєбодзи, и барз єй крашнє зоз женми препровадзиц час.
