Жатва при самим концу, комбайни закончую остатнї поля котри остали ище вше нєвитлачени, а общи упечаток же жито добре зродзело, и же парасти треба же би були задовольни. Гей, задовольни зоз урожайом, алє су вшелїяк нєзадовольни пре одкупну цену котра роками, алє наисце роками иста, лєм коло 20 динари за килоґрам.
У трошительним швеце рахунок таки – за кифлу потребне 3 кґ жита, за векну хлєба 4, за куґлу сладоляду найменєй 5 кили, за кафу у кафичу треба 10-12 килоґрами жита, за манду паштету аж 2 кґ, а за килоґрам штучного гною 5 кґ жита. 10 килоґрами жита вредза тельо кельо и литра нафти, a 2.000 килоґрами тельо кельо ґума на меншим трактору, лєбо 1.000 кґ тельо кельо ґума на приколици, надпоминам, на меншей приколици.
Златни поля войводянскей ровнїни зродзели, алє, нажаль, ситуация алармантна, а цо би було кед би була суша, лєбо, нє дай боже, даяка нєпогода.
Вше актуалнєйше питанє самих парастох чи продукция успе покриц трошки укладаня, и чи ше зароби достаточно же би ше поля поробело и за нарок. Ясно же ше парасти знаходза так як знаю. Углавним кущик ше „ущипнє” на шицким, та ше якош завре круг укладаня, алє очиглядно же то уж и на рахунок того же ше зменшує укладаня, котри насампредз муша буц цо менши же би нє цагали параста до вельких задлужованьох. Общи упечаток, як толкую фаховци, тот же ше вше вецей шеє нєдеклароване нашенє жита, кед нє нужда, прескочи ше и пирсканє, а прикармиц го мож и зоз штучним гнойом.. Правда, хто як и кельо може.
Прето тогорочна жатва нє лєм приповедка о квалитету зарна и метерох урожаю. То уж озбильна приповедка о рахунку, котри вше частейше нє идзе на хасен тих котри жем обрабяю.
Нажаль, польодїлски култури постали зарабровани на тарґовищу, котре наисце нємилосердне. Цени штучних минералних гнойох, горива, нашеньох, и защитних средствох у остатнїх даскельо рокох значно поросли, аж и по даскельо раз, так повесц єст и таке цо подрагшело и за 300 одсто, док одкупни цени житаркох стаґную роками. Винїмок бул 2022. року кед цени житаркох були векши, жито було и вецей як 30 динари, алє уж идуцого року цени зменшани на вецейрочни просек пред тим, а тераз то наисце нєдостаточно же би ше покрило трошки продукциї на таким тарґовищу.
Широко патраци, польопривреда то нє лєм обрабянє польох, алє и судьба шицких парастох, їх фамелийох и обисцох котри жию за жем. Польопривреда то людзе котри ше каждого року наздаваю же будзе лєпше, и же цена зарна виплаци їх труд и роботу.