Вода нє лєм природни ресурс, вона условиє за живот, розвой и отриманє живого швета. Того лєта вода постала тема о котрей ше бешедує каждодоньово, гоч мож повесц же прешлого року лєто було вельо цеплєйше, же цали юлий и половка авґуста бул пекельни зоз температурами медзи 35 и 40 Целзиюсово ступнї. Того лєта, тераз пришла перша озбильна цеплотна габа, а у юлию призначовани просеково температури, и хвиля була приємно лєтна, прилапююца. Медзитим, того року маме озбильни проблеми зоз воду, нєдостаток води у ричних коритох, преглашену позарядову ситуацию на Гидросистеми ДТД и забранєне залїванє и вицагованє води зоз нєй.
Причини прецо того року ситуация горша и драматичнєйша, а прешле лєто було гет цеплєйше, то уж остава на компетентних же би розтолковали, алє факт же є так.
Корито рики Дунай озбильно зменшане з воду, загрожена плївна драга, по Дунаю мож ходзиц пешо тамаль кадзи нїґда нє могло, як паметаю старши. Пре поцагнуту воду, на сподку рики ше указали остатки войнох и историї. Пумпи котри вицаговали воду зоз Дунаю и полнєли Гидросистему ДТД застановени, нєт одкаль, бо уровень Дунаю спод минимума.
Пошлїдки такей ситуациї вецейнїсти, загрожени живи швет у беґельох, загрожени тисячи гектари жеми котри ше наводньовало зоз тей системи, праве тераз кед поля найжаднєйши, и загрожена плївна драга, а то охабя пошлїдки на економию.
То вецей нє лєм сезонска нєприємносц од горучавох, алє озбильне виволанє зоз котрим ше очиглядно будземе вше частейше стретац. Важне наглашиц и же причини такей ситуациї нє мож звесц лєм на єден фактор, длуги периоди суши, моцни цеплотни габи, климатски пременки, алє и вецейдеценийна занєдзбаносц инвестованя до отримованя водопривредней инфраструктури, творя обставини у котрих и єден сухи период прави озбильни пошлїдки.
Шлїдом позарядовей ситуациї, Покраїнска Влада нєдавно видвоєла 270 милиони динари за ЯВП „Води Войводини” котре ше стара о цалей гидросистеми у Войводини, медзитим, сиґурно же резултати тей инвестициї нє буду видлїви такой. Но, наздаваме ше же нарок дочекаме сушу порихтанши.
Фаховци спозорюю же таки ситуациї нє шму буц нєсподзиванє, препорученє же би ше беґелї гидросистеми поряднє вичисцовало од мулю и же би ше кошело траву, а же би ше исти тоти пририхтани акумулациї и беґелї полнєло у периодзе кед у Дунаю єст аж и звишка води. Так повесц, шпоровац и одкладац теди кед єст зоз чого.