Прешли уж два длугоки роки од того 24. фебруара 2022. року кед Русийска Федерация нападла суверену у нєзависну Україну и драстично пременєла ситуацию у швеце. Вименєна ґлобална безпечносц, ланци з енерґию, як и з єдзеньом, а нуклеарна опасносц постала найвекша од часу Жимней войни. Медзинародне право ище раз поґажене.
Линия фронта у тей войни длугока вецей як тисяч километри, а Русия по нєшка завжала коло 17 одсто українскей териториї. Українци указали вельку шмелосц и одлучносц зопрец ше шветовей сили и одбранїц свойо териториї. Велї погинули, алє героє нє умераю.
На означованю дворочнїци од аґресиї Русиї на Україну, були присутни и европски лидере у Києву же би зоз предсидательом України Володимиром Зеленским оддали почесц шицким погинутим борцом за мир и нєзависносц України. За централне место означованя дворочнїци українски предсидатель вибрал києвски аеродром Ґостомел дзе ше водзела єдна з перших вельких биткох. Зеленски виявел пред лидерами заходних жемох и пред предсидательку Европскей комисиї Урсулу фон дер Лаєн же ше Українци буду бориц до побиди, а, медзи иншим, гварел и же ‒ мож знїщиц авион, алє нє мож знїщиц сон о шлєбоди зоз котрим кажди Українєц зашпи и будзи ше уж вецей як 730 днї.
У нашей престолнїци, у Беоґрадзе, Амбасада України вєдно зоз представнїками других амбасадох и представнїцтвами медзинародних орґанизацийох, як и зоз сербску явносцу, українску заєднїцу и гражданством орґанизовала „Марш солидарносци зоз Україну”. Присутни ше прешейтали по централних улїцох главного городу и з тей нагоди поручели же су за мир и процив войни хтора у України тирва уж 10 роки.
Остатнї два роки були барз чежки за Україну. На фронту препадла контраофанзива, а русийске войско освоєло два стратеґийно важни городи на востоку України, Бахмут и Авдеєвку. Помоц зоз Заходу сциговала, алє є нєшка спомалшена и нє вше сцигує начас, окреме зоз ЗАД. Вельке число цивилох напущело жем, або є розселєне до других часцох у держави.
Европска уния и ЗАД принєсли нови санкциї процив Русиї, алє Москва врацела зоз контра мирами. Два роки войни принєсли вельке руйнованє городох ширцом України, страцени велї животи, присутни вельки боль, трауми и вистатосц, алє Українци и далєй шмело поручую же витирваю у тей борби за мир и нєзависносц.
Воєни ресурси ширцом швета ше звекшую, о мировних прегваркох и концу войни нїхто нє бешедує. На перши попатрунок парадоксалне же напад на Україну приведол до дальшого ширеня НАТО-а. Традицийно нєутрални жеми як цо були Финска и Шведска глєдали приєм и нєшка су часц тей алиянси.
ruske.redaktorka@gmail.com