Студенти за правду и транспарентносц

автор О. Планчак Сакач
131 Опатрене

После вельких пияткових протестох студенти и гражданє, на тисячи, препровадзели дзень и ноц блокируюци Автокоманду у Беоґрадзе, єдну з найвекших транспортних розкрижйох у престолнїци. Новосадски студенти заказали нови протест, вовторок на 16 годзини, опрез просторийох СНС-а, пре напад на їх колеґох хтори ше случел вноци. Бул то вельки протест у котрим Новосадянє блокирали цали Булевар ошлєбодзеня, а студенти подзековали полициї на швидким реаґованю и поволали най би так було и убудуце.

Студентски бунт ше шири и постава вше векши, по сполнєнє їх вимогох. Потримовку студентом дали польоприверднїки, уметнїки, дохторе, адвокати, судийове, просвитни роботнїки, спортисти… Число городох и местох у Сербиї, у котрих од 1. новембра прешлого року по нєшка, голєм раз отримани протест пре страданє 15 особох на реконструованей Желєзнїцкей станїци у Новим Садзе, вироснул през викенд на 151, цо сообщел Архив явних сходох.

През свойо вимоги студенти конєчно указали же политика у сущносци – бриґа о дружтву. Прето мож повесц же нам старшим вони тримаю лекцию з демократиї. Студенти, на нєсподзиванє велїх, представяни як апатична ґрупация котру интересує лєм одход зоз жеми, почали дзелїц лекциї и зоз патриотизму. Почали преволовац институциї на одвичательносц. Ушлїдзело спрам нїх физичне насилство, тарґетованє, медийни линч и рижни форми прициску.

Як ше у преси визначує, студенти предводза єдинствени рух котри ше розликує од традицийних опозицийних инициятивох. Їх директна вимога за правду и одвичательносц институцийох окреме одгукла у дружтву котре церпи нєправду. Студенти нє понукаю политичну алтернативу, бо то нє їх мисия. Вони нє на улїци же би приведли лєпшу владу и власц, алє же би поцагли гранїци котри анї єдна власц нє шме прейсц. Студентски вимоги политични, алє їх закладанє и акциї нє политични.

Академци обачели кельо може буц опасна нєконтролована державна власц, котра иґнорує вимоги за почитованьом законох. Прето блокади и протести указую и поволую на почитованє державного порядку. Студенти нашо чуваре держави як заєднїци шлєбодних людзох, держави як системи институцийох, держави як будовнї плуралних идентитетох и заєднїцкей судьби шицких нас у нєй. Студенти шпиваю державну гимну, ноша национални застави попри факултетских символох, а їх патриотизем засновани на Уставу и защита правох шицких гражданох держави.

Британски Ґардиян ошвицел значенє студентских протестох у Сербиї и їх улогу у ґлобалним дискурсу о правди, корупциї и гражданских правох. Їх одлучносц витирвац у своїх вимогох длуги два мешаци, обрацела увагу шветових медийох и указала же борба за правду и одвичательносц може мобилизовац на тисячи людзох, аж и у зложених политичних обставинох.

Вовторок спадла Влада Републики Сербиї и тераз є у технїчним мандату. Скупштина Републики Сербиї треба же би прилапела задзекованє премиєра Милоша Вучевича, а вец у 30 дньох владаюца векшина може оформиц нову Владу, або ше розпишу виберанки.

ruske.redaktorka@gmail.com

ПОВЯЗАНИ ТЕКСТИ