Вербащанє мали найвекши улов на Чукияди

автор А. Медєши фото: М. Пашо
228 Опатрене

РУСКИ КЕРЕСТУР – Домашнє Здруженє спортских рибарох „Коляк”, внєдзелю 17. септембра по други раз було домашнє змаганю у лапаню чуки, котра ше орґанизує у рамикох Асоцияциї „Чукиядиˮ, а награди додзелєни першим пейц найлєпшим екипом.

На Чукияди участвовали 64 двочлени екипи, а лапало ше на штирох циґоньох.

Перше место завжала екипа „Деда и унукˮ зоз Вербасу котри влапели чуку чежку 1200 ґрами, другопласована екипа „Леґенде Селенчеˮ зоз Селенчи зоз уловом од 800 ґрами, треце место припадло екипи „Три шешираˮ зоз Бачкей Паланки, а зоз уловом од 700 ґрами, потим екипа „Мира и Мирославˮ зоз Крущичу мали улов од 500 ґрами, док 5. место припадло екипи „Видраˮ зоз Крущичу.

Котизация за змаганє виношела 3.000 динари, од хторих 1.000 динари ишло Здруженю „Колякˮ зоз хторих ше обезпечело фриштик змагательом и наградни погари, а 2.000 динари од котизациї змагателє давали до наградного фонду.

Так, першопласовани достали пенєжну награду од 64.000 динари, 2. место було наградзене зоз 30.000 динарами, потим 3. место достало 20.000 динари, 4. место 15.000, а 5. место достало 3.000 динари.

Зоз Руского Керестура участвовали аж седем екипи, а змаганє тирвало пейц годзини. Главни судия бул Мирко Фекете, хтори мал задлуженє коло приявйованя и дочекованя госцох як и вицагованя числох, а судийове на терену були и Дарко Джуджар и Дарко Чернок.

После Чукияди у рамикох Асоцияциї у Руским Керестуре, на шоре Чукияда у Вербаше, а потим каждого шлїдуюцого викенду у ище осем местох.

ПОВЯЗАНИ ТЕКСТИ