На нєдзелю, 17. децембра, отримаю ше позарядово парламентарни, покраїнски, беоґрадски и локални виберанки у скоро трецини општинох у Сербиї, алє анї на єдним виберацким месце нє будзе ше гласац на вецей як двох гласацких лїсткох. Републична виберанкова комисия утвердзела збирни вибeранково лїстини кандидатох за Парламент Сербиї и будзе их 18, за Скупштину АПВ преглашени 13, а за Беоґрад преглашени 14 виберанково лїстини.
Вецей як 150 000 контролорох и надпатрачох буду провадзиц реґуларносц позарядових виберанкох. Спрам закону, кажда виберанкова лїстина може мац єдного контролора и заменїка контролора у виберацким одбору на вкупно 8 273 виберацких местох ширцом Сербиї, без огляду же ше на велїх местох будзе гласац за два уровнї власци. Надпатрачох на виберанки посилаю домашнї и иножемни нєвладово орґанизациї, алє и Канцелария за демократски институциї и людски права, ОЕБС, Европски парламент и други.
Контролорох хтори участвую у процесу виберанкох найчастейше делеґую политични странки, а за тоту роботу су плацени з державного, а нє зоз странкового буджету, бо орґанизую виберанки у мено гражданох. Контролоре преверюю идентитет гласачох, ґарантую тайносц гласаня, читаю гласи и подноша пригварки Републичней виберанковей комисиї. Найвекша одвичательносц за реґуларносц виберанкох будзе, як и вше, на плєцох виберацких одборох у котрих кажда з виберанкових лїстинох будзе мац по свойого члена, односно контролора.
У кампанї обачени велї нєреґуларносци, на хтори указовали и гражданє, од того же ше окончує прициски на гласачох, же на адреси сцигую поволанки людзом хтори ту нє биваю, проблеми зоз виберацким списком, бо поволанки сцигую и умартим особом. Потим ту и фалсификовани подписи за дзепоєдни лїстини, та по злохаснованє функционерскей кампанї. У кампанї приступ опозициї медийом бул огранїчени, нє було квалитетни дебати, дуели, дискусиї на актуални проблеми, представянє политичних програмох було лимитоване. Случовали ше и инцидентни ситуациї хтори ше за явносц нє розришело.
Улога надпатрачох у виборним процесу же би провадзели кампаню, условия у котрих ше орґанизує виберанки, цек на дзень виберанкох, читанє гласох и сообщованє резултатох. Надпатраче нєзависно провадза цек виберанкох и на нїх нє можу участвовац.
Виберанки то швето демократиї, теди кажди граждан оценює роботу тих хтори були на власци и кажди глас єднак важни и єднак вредзи. Ми тоти котри одлучуєме кому звериме идуци штирирочни мандат же би у нашо мено одлучовали о найважнєйших питаньох за народ и державу. Власц наш сервис и вона на виберанкох подноши рахунки за свойо одлуки гласачом. Прето на нєдзелю, 17. децембра, видзме на виберанки и зоз своїм гласом виберме тих цо буду дзбац о нашей судьби, стандарду и просперитету у идуцих штирох рокох.
ruske.redaktorka@gmail.com