Викенд пред нами будзе нательо (пре)богати з културнима подїями, насампредз театралнима, же нє годно постарчиц попровадзиц кажду.
Уж такой на початку, пияток, премиєра. Драмски студио Руского културного центру у Новим Садзе на своєй матичней сцени виведзе представу „Початок” хтору як комплетни автор (текст, режия) подписує Славко Винаї.
Ютредзень, соботу, знова премиєра. Руски народни театер „Петро Ризнич Дядя” у Руским Керестуре премиєрно виведзе представу Милоша Николича „Метаморфози” котру як режисер подписує Славко Орос, зоз хтору ше урядово подзвигнє зависа над 54. Драмски мемориял Петра Ризнича Дядї.
Скоро у исти час, алє у Руским културним центру у Новим Садзе, Драмска секция КУД „Тарас Шевченко” зоз Дюрдьова виведзе представу „Меркуй жени” Андрея Курейчика у режиї Янка Лендєра, зоз хтору будзе отворени ювилейни, 20. Фестивал малих сценских формох „Дюра Папгаргаї”. После на репертоару буду ище два драмски слички – Мелания Ковач виведзе инсерти зоз монодрами „Милионерка” на текст Ирини Гарди Ковачевич, а Янко Лендєр у власней режиї пририхтал виривок зоз представи „Илия Опозиция” по тексту Дюри Папгаргая.
Дюрдьовчанє зоз представу „Меркуй жени” ознова виду на сцену уж дзень познєйше, на нєдзелю, алє у Керестуре на Мемориялу. Бавиц динамичну комедию з павзу од (менєй як) 24 годзини на двох розличних сценох було би виволанє и за искуснєйши ансамбл – увидзиме з якого „штофу” млади дюрдьовски ґлумци, алє жичиме най у тим єдинственим искустве и Талия дакус примеркує на нїх.
После интензивного викенду през тидзень будзе дакус зациху, голєм по стреду кед на Мемориялу у матине-термину стартує дзецински репертоар. Потим, уж од пиятку ознова будзе динамично. Драмски студио „АРТ” Дома култури Руски Керестур премиєрно виведзе „Служнїци”Жана Жаниєа, у режиї Владимира Надя Ачима. На соботу на Мемориял приходзи ансамбл новосадского РКЦ и представа „Початок” хтору так ище „фришку” увидзи и керестурска публика, а вец на нєдзелю, як ше гвари, лакотка за конєц – госцуюци ансамбл Словацкого войводянского театру з Бачкого Петровцу зоз представу Анд`жея Сарамановича „Тестостерон” хтору режирал Радоє Чупич.