БЕОҐРАД – Шицки автомобили старши од 15 рокох буду мушиц два раз рочнє пойсц на детальни технїчни препатрунок – то новосци правилнїка прилапеного 5. мая, котри ступи на моц 5. юлия.
Як преноши РТС, статистика указує же у Сербиї коло 30 одсто автомобили старши од 15 рокох. На технїчни препатрунок треба привесц чисти авто. Препатрунок тирва коло 35 минути, а шицко ше тераз зазначує зоз фотоапаратом, а власнїки автомобилох буду мушиц плациц обидва обовязни технїчни препатрунки.
Одредби закона котри ше одноша на шейсцмешачни технїчни препатрунок превозкох, як цо то превозки старши од 15 рокох, будзе ше применьовац на превозкох котрим ше после 5. юлия 2018. року будзе видавац реґистерска налїпка, та ше перши шейсцмешачни технїчни препатрунок превозки, у складзе з новима предписанями, будзе окончовац после 5. януара 2019. року, гварел Стоян Спасич зоз МУП-у Сербиї.
Потераз велї нє наплацовали технїчни препатрунок, бо тото „закривали” осиґураня кед ше куповали полиси. По новим, цену технїчного препатрунку предпише законодавец, а у Здруженю технїчних препатрункох гваря же би вона требала буц коло 30 евра плус трошки котри маю Технїчни препатрунки спрам Аґенциї за безпечносц транспорту, гвари Марко Манолович, руководитель технїчних препатрункох.
Технїчни препатрунок нє будзе лєм формалносц, алє озбильне преверйованє превозки, а тоти мири ше буду одношиц и на автобуси и камиони.