НОВИ САД – Руска редакция РТВ Войводини патрачох пририхтала богату и рижнородно новорочну програму.
На нєдзелю, 30. децембра на 20 годзин, будзе емитоване специялне виданє остатнього ТВ Маґазина у тим року. Будзе то музично-гумористична емисия под назву „У Чикаґу таке нове…”, у хторей участвую млади музичаре и шпиваче хтори мали свой вечар на „Червеней ружи” и ґлумци комичаре, на дружтвених мрежох познати як „Ступиденти”. Реприза ТВ Маґазина будзе 3. януара на 21,30 годзин.
У новорочней ноци, 31. децембра на 21,30 годзин почнє найновше, новорочне виданє заєднїцкей емисиї за младих „Пулс младих”, а термин за репризне емитованє 1. януар на 8 и 2. януара на 15,40 годзин.
Попри тим, 31. децембра од 22 до 00,10 годзин, будзе емитована уж традицийна заєднїцка новорочна програма на язикох националних заєднїцох, того року под назву „Новорочни приповедки”. У єй рамикох патраче годни одпатриц три музични точки по руски и интересантну пригодну приповедку хтору виприповеда Исо Планич. Реприза будзе 1. януара на 8,30 и 2. януара на 8 годзин.
У термину емисиї „Добри вечар, Войводино”, 3. януара, буду емитовани ексклузивни репортажи о означованю крачунских и новорочних шветох у Братислави и Бечу, як и о живоце наших людзох у тих городох. Реприза емисиї будзе 4. януара на 9 годзин.
