Весело на „Веселинки”

автор опс фото вев
958 Опатрене

НОВИ САД – У Руским културним центре (РКЦ) у Новим Садзе всоботу, 10. юния, отримани Шеснасти Фестивал дзецинскей творчосци Руснацох Войводини „Веселинка”, на хторим пополадню орґанизована подобова роботня на хторей дзеци рисовали по мурох; роботня мажоретского танцу, Мистер Твистер и того року дзецом правел маґични балони, маджионичарски трики им указовал Милан Воларе, а як ше рисує мурал Станислав Мудрох, котри на муралох рисує загрожени животинї.

Вечар на бини у дворе РКЦ була музично-танєчна програма, на хторей наступели дзеци з РКЦ и школяре котри у новосадских школох уча руски язик, школяре з Руского Керестура, Дюрдьова, Коцура, зоз Танєчней школи „Партизан” з Нового Саду, Словацкого КУД „Павел Йожеф Шафарик” з Нового Саду, як и мажореткинї з Панчева. Прогаму водзели Павлина Шепински и Александра Живкович Бучко.

На програми школяре рецитовали, шпивали, грали, ґлумели и танцовали, а того року госци на „Веселинки” у публики були и школяре зоз Словацкей, зоз Земплинскей Теплици, котри були у нащиви нашей Школи у Руским Керестуре.

На початку програми на Фестивалє привитани заменїк предсидателя Националного совиту (НС) Руснацох Йовґен Мудри, предсидатель Вивершного одбору НС Желько Ковач, о.д. директора Заводу за културу войводянских Руснацох Анамария Ранкович, як  и госци зоз Словацкей.

„Веселинка”, хтору РКЦ орґанизовал з финансийну потримовку Министерства култури и информованя Влади Сербиї и Заводи за културу войводянских Руснацох,  мала и гуманитарни характер, бо ше зберало добродзечни прилог за коцурского школяра Желька Шанту, котри муши пойсц на операцию очох до Русиї.

ПОВЯЗАНИ ТЕКСТИ