У познатим репрезентативним просторе за музични збуваня у Новим Садзе – Синаґоґи, Хор „Гармония” з Нового Саду, пияток, 5. мая, зоз цаловечаршим святочним концертом под назву „Хор Гармония – нашо дзешец роки”, пред вельким числом публики и зоз госцами учашнїками означел дзешецрочнїцу свойого иснованя и роботи.
Пред 10 роками, на инициятиву о. Романа Миза, тедишнього пароха новосадскей Грекокатолїцкей парохиї св. апостолох Петра и Павла, основани мишани хор, як заєднїцки хор тей парохиї и Руского културно-просвитного дружтва, а нєшкайшого РКЦ. Дириґентка Хору од самого снованя була Сузана Ґрос-Маркович, хтора уложела вельку енерґию, любов и труд же би тот хор досягнул таки високи уровень. Од септембра 2014. року дириґентка Хору „Гармония” Весна Кесич Крсманович, хтора скоро 30 роки роби як дириґентка Хору Опери СНП у Новим Садзе, а основала и Мишани вокални
ансамбл „Класика Нова”, составени зоз оперских уметнїкох, хтори промовує сучасне хорске шпиванє.
Концерт почал зоз композицию „Оче наш” Александра Вуїча, хтору одшпивали Хор „Гармония” и Мишани вокални ансамбл „Класика Нова”, а вец одшпивали и вибрани духовни композициї. Потим ше им придключел госцуюци Хор „Розанов”, та шицки вєдно одшпивали композицию „Милост мира” Арханґелского, под дириґентством Весни Кесич Крсманович, а зоз своїм вибраним репертоаром спомнути хори наступели и окреме.
Попри ансамбла „Класика Нова”, у хторим шпива и наша Агнета Тимко Мудри, та дюрдьовского Хора „Розанов”, хтори ше на концерту представел зоз духовнима композициями под дириґентством Татиани Барна, на концерту учасц вжала и Хлопска шпивацка ґрупа „Фант’є” з Нового Саду, под руководством Борута Павлича.
Ювилант, Хор „Гармония”, виведол вецей духовни, народни и шветово познати композициї, под дириґентством Весни Кесич Крсманович, як и своєй першей дириґентки Сузани Ґрос-Маркович. Як солисти на концерту наступели члени „Гармониї” Гелена Папуґа и Ана Римар, як и оперска шпивачка Свитлана Декар, а представел ше и дует домашнього хору Ана Римар и Йоаким Гаргаї. Дзепоєдни музични точки на клавиру провадзел Йожеф Ритер, а на гармоникох Владимир Сивч и Давор Сабо.
Солистки Хору – Гелена Папуґа и Ана Римар
През конферансу, хтору водзели Марина Сакач и Мария Римар, публика упозната з историятом и роботу „Гармониї” и єй госцох учашнїкох на концерту, а конферансу з тей нагоди написала Ана Римар. На вельким видео биму под час концерта указани фотографиї зоз архиви Хору „Гармониї” за хтори бул задлужени Михаїл Римар.
Духовному оцови Хору „Гармония”, о. Романови Мизови з Нового Саду, двом спомнутим дириґентком Хору, Рускому културному центру и Грекокатолїцкей парохиї
св. апостолох Петра и Павла з Нового Саду, як сновательом Хору и руководительови Хлопскей ґрупи Борутови Павличови уручени и окремни подзекованя, а подзекованя уручени и солистком на тим концерту, корепетитором и госцом учашнїком.
Концерт закончени зоз надихнуту бешеду першей дириґентки Сузани Ґрос-Маркович хтора свойо упечатки о роботи з тим Хором подзелєла зоз публику. Вона пояшнєла же назва Хору „Гармония” нє вибрана случайно, алє є вибрана пре вецей причини. Перше же хористи пестую гармонию медзи людзми, бо у Хору члени вецей конфесийох, народох и културох, а гармония присутна и у музики и у космосу. Ґрос-Марковичова на концу пречитала текст Андричовей молитви, та концерт закончени так як и почал, зоз молитву, а шицки хтори були пияток у Синаґоґи, дому пошли збогацени за прекрасне и глїбоке духовне и музичне дожице.
Попри велїх почитовательох музики и хорского шпиваня, зоз своїм присуством ювилей Хору „Гармония” повинчовали и наш апостолски еґзарх, владика кир Георгий Джуджар, заменїк предсидателя Националного совиту Руснацох Йовґен Мудри, предсидатель Вивершного одбору НС Желько Ковач и дзепоєдни священїки з наших парохийох.
ПРОГРАМА БУЛА МОБИЛНА И РИЖНОРОДНА
– Щешлїва сом же ше нам удало концерт винєсц у новосадскей Синаґоґи, хтора у Новим Садзе єдна зоз найрепрезентативнєйших концертних дворанох, дзе ше медзи єй мурами чує виводзенє углядних шветових уметнїкох и ансамблох. Велька нам чесц була же зме пред вельочислену публику могли указац гевто до чого зме уложели вельо труду и часу, а зоз програму за котру зме ше потрудзели же би на сцени була мобилна и рижнородна. Програма була зоз прекрасних дїлох духовней музики росийских композиторох, потим традицийна, даґдзе нїжна, а даґдзе веселого звуку рускей народней музики, по українски шпиванки, бо то гевто цо Руснаци ноша у своїм єству и култури. Концерт закончени зоз музику швета, а нам учашнїком концерту було полне шерцо од цеплих аплаузох и потримовки публики – виявела после концерту Весна Кесич Крсманович.
КРАСА ЗВУКУ И СЛИКИ
– Концерт бул велїчезни и на високим уметнїцким уровню, а Хор „Гармония” як гвизда вечара, представел ше на найлєпши способ и указал наисце високи уровень у каждим поглядзе. Могла ше видзиц и чуц єдна озбильносц, дозретосц, достоїнство, єдинство, убавеносц до перфекциї, з єдним словом краса звуку и слики. Госци тиж так були фантастични, кажде на свой способ и у своїм стилу. Зоз свою професийносцу и красу звука збогацели и возвелїчали тот прекрасни ювилей.
Особно сом ше чувствовала барз возбудзено. Преплєтали ше велї емоциї щесца, смутку, носталґиї, треми и одушевия. Пишела сом ше з тим цо сом витворела, на гевтот вельки труд и роботу з надприродну енерґию котру сом уложела же би тот окремни Хор „Гармония” постал и бул тото цо є нєшка – гварела Сузана Ґрос-Маркович.
ПРЕКРАСНА МИСИЯ
– Ище пред 10 роками, кед сом ше прилапел буц директор Хору, обачел сом же то єдна прекрасна мисия, бо у Хору маме членох од 18 по 88 роки, и то треба даяк гармонизовац же бизме шицки почувствовали потребу буц вєдно. Хор нєшка ма коло 30 члени, вони приходза и одходза, а Хор, як цо видзиме, тирва, а моя мисия же бим оможлївел людзом робиц тото цо любя – гварел директор Хору „Гармония” Борислав Сакач.
Паноцови Романови Мизови подзекованє уручує директор Хору Борислав Сакач