Кед особа ма таланту або прихильносц ґу дачому, од того може витвориц власни бизнис, алє тиж и вельке задовольство. Ивана Тиркайла з Дюрдьова шминка уж вецей як седем роки, а по законченю курса за шминканє вона єднак ужива, алє тераз зоз векшим знаньом. Єй талант препознали и власнїци трох салонох у Новим Садзе, у котрих вона анґажована як шминкерка. Гвари же за ню час става док шминка.
Ище у стреднєй школи, Ивана почала шминкац свойо товаришки пред виходом до центру. Теди мала дзеку, а з часом ше указало же ма и таланту. Прето ше товаришки поскладали и вєдно купели щеточки и вельку палету сенкох за очи з рижнима фарбами. Од теди их вецей нїхто други нє шминка, окрем Ивани. З роками ше усовершовала, патрела рижни туторияли и знїмки на Ютюб-у. Нє сцела ше упущовац до курсох шминканя, прето же єй приоритет бул факултет и прето ше на курс анї нє уписала зоз вельку амбицию, гоч заш лєм, сцела знац рижни технїки котри нє лєгко научиц. Одлука ше указала як добра, бо ше после того дзвери сами почали отверац, а вона навелько уживала у своїм гобию.
– Було ми значне же бим курс закончела при визначней особи у швеце шминканя, бо сом жадала научиц цо вецей, а нє лєм мац го пре сертификат. Учели зме як хасновац и класц кармини, пудери, як поскладац шминку и нарисовац оберва на розлични форми твари и шицко друге цо би требала знац єдна шминкерка – гвари Ивана Тиркайлова.
Курс шминканя закончела у марцу, пред роком и пол, и вельо шминкала за свадзби и други вешеля, а тераз Ивана роби у трох салонох у Новим Садзе, алє и индивидуално, та шминканє мож заказац, кеди и дзе вам одвитує. Роботу, знїмки и фотоґрафиї мож провадзиц на єй Фейсбук и Инстраґрам профилу под єй меном.
Ивана Тиркайла
ШМИНКА И ФОРМА ТВАРИ МУШA ШЕ СКЛАДАЦ
Шминкер муши буц добри комуниколоґ и психолоґ, и потолковац чом дацо треба, або нє треба, положиц на твар. Ивана у шминканю перши хвильки хаснує за упознаванє особи и єй характеру, же би преценєла яки стил може „винєсц”.
– Розлични людзе, маю розлични профили, прето у тей роботи єст досц виволаня. Найважнєше ми же би жени, дзивки, мали до мнє довирия, бо ше случує и таке же ми укажу фотоґрафию як сцу же би випатрали. Теди им мушим потолковац же ше твар шминка на основи єй форми, насампредз ока, и же треба визначиц гевто цо на нїм найкрасше. Тиж, иста шминка нє може исто стац на твари штерацецрочней и двацецрочней – толкує Тиркайлова.
Нови продукти у першим шоре випробує на себе и мацери Любки. Гвари же векшина продуктох доступна у нашей жеми, а потребне коло 200 евра же би ше на початку купело полупрофесийну шминку. Розлични марки шминкох маю розлични цени, а пудери найдрагши, тоти квалитетнєйши коштаю и коло 50 евра. Драге, нє вше и найлєпше.
– Єст алтернативи, алє треба часу же би ше здобуло искуство же би ше почувствовало цо значи квалитет и чи го мож з дасчим поровновац або заменїц. Прето квалитет и искуство у тей роботи барз значни. Найлєпша реклама, думам же гевта „од уха до уха” – припознава Ивана.
СЛАВНИ „БАНАНКОВО” ОБЕРВА
Кед почали буц популарни грубши оберва, дзивки часто „загрубйовали” свойо оберва зоз шминку. Теди и настала назва „бананово” оберва, прето же так випатрали.
– Дакому то здабе на груби оберва котри нє провадза лениї твари и вец их таки и нарисую. Часто и зоз погришну ниянсу фарби. Було велї случаї же дзивки маю подло вирисовани оберва з „японску” методу, та их мушим ублажовац, бо ше нє складаю зоз форму твари – гвари млада шминкерка.
Ивана абсолвент на державним Правним факултету у Новим Садзе, на общим напряму. За дзешец роки себе нє видзи як шминкерку, алє, ище док студира, хаснує шлєбодни час за тот гоби котри барз почитує и люби, и планує закончиц ище даскельо курси.
– Годзину пошвециц єдней особи котра жада же бим ю нашминкала, за мнє привилеґия и видувни вентил, прето же сом теди у своїм швеце, у нїм влада нирвана и цалком сом пошвецена каждому деталю – одкрива Ивана.
СОВИТ: МИРА НАЙВАЖНЄЙША
Ивана шицким дзивком совитує же би за кажди дзень нє хасновали класични пудер, алє „беби” креми. Вони гидрираю и тонираю скору.
Пудер ше купує у истей ниянси яка и скора – поровнує ше зоз ниянсу скори на ставцу дланї и руки з нукашнього боку. Дзивки котри маю дробнєши очи, наглашиц их можу зоз чарну, лєбо шиву „сенку”; направиц благи „smokey eyes”, або з алайнером вицагну смужку над оком, то такволани „мачкасти” очи. Око мож визуално зменшац з хаснованьом чарного клайбаса зоз нукашнього боку ока, на водовей смужки.За полнєйши уста шме ше прейсц до єден милиметер понад ґамби зоз ниянсу цмейшим клайбасом од кармина.
У несесеру кажда дзивка би требала мац пудер, „руменило”, маскару и кармин, найлєпше єден „беж” и червени. Нєумити щеточки и шпунджиї поставаю жридло бактерийох. Требало би их умиц, ушориц после каждого другого, або трецого хаснованя.Твар ше муши гидрирац з адекватну крему, а пред тим го треба добре умиц зоз, наприклад, мицеларну воду.
– Мира и допатранє найважнєйши прето же скора памета. Остатнї тренд то чиста и виєдначена твар, цо значи, добре вибрани пудер, благи контури твари и благи кармин. Очи у другим планє. Треба робиц же би „тен” бул красни – заключує Ивана Тиркайла.
