РУСКИ КЕРЕСТУР – Орґанизовани, символични дочек Нового 2018. року у Руским Керестуре и того року будзе у центру валала. На 23,30 годзин будзе пущена музика, а точно на полноци будзе виштрелєни огньомет за котри средства обезпечела Месна заєднїца Руски Керестур. У Катедралней церкви у новорочней ноци, 30 минути после пол ноци, будзе традицийни Новорочни молебен.
Проблем озбильнєйшей и спектакуларнєйшей орґанизациї новорочней програми настал нє лєм пре нєдостаток финансийох, алє и пре нови риґорозни законски предписаня, по котрих потребни рижни лиценци, професийну безпечну службу, прияву до полициї, обезпечованє дежурней наглей медицинскей помоци и огньогасцох, анґажованє фаховцох за виштерльованє огньомету и друге.
У Руским Керестуре, у погосцительних обєктох, орґанизовани дочек з музику планує лєм Ресторан „Лонґов”, хтори будзе наплацовац уход и вечеру по виборе госцох, а подобно и за репризу дочеку 1. януара. Подробнєйши информациї мож достац у ресторану на тел. 025/703-611.
Того року першираз Дочек Нового року нє будзе орґанизовани у ресторану „Червена ружа” пре нови законски предписаня о емитованю музики, т. є. вельки такси за СОКОЙ. Ресторан того вечара будзе поряднє отворени, без музики, зоз скраценим єдловнїком, а за тот вечар мож резервовац стол за 100 динари.
Дискотека „Амадеус” 31. децембра будзе робиц, алє нє будзе орґанизовани дочек, а уходнїца до диску будзе 300 динари.