СНЇНА (СЛОВАЦКА) – XXXIV Фестивал духовней писнї у Снїни отримани 3. и 4. октобра у орґанизациї Союзу Русинох-Українцох Словацкей Републики.
На поволанку орґанизатора же би участвовали у програми Фестивалу и на провадзацих збуваньох одволал ше хор Грекокатолїцкей церкви Успения Пресвятей Богородици з Коцура, котри на Фестивал до Снїни одпутовал зоз своїм парохом и делеґацию Союзу Руснацох Українцох Сербиї.
После приходу до Снїни, всоботу, 3. октобра, коцурски хористи пошли до Тополї, места дзе ше народзел русински будитель Александер Духнович и там отримали цаловечарши концерт. У першей часци концерта представели ше з духовнима писнями, док у другей часци одшпивали даскельо народни шпиванки, препознатлїви домашнєй публики, прецо були наградзени з моцним аплаузом. Дириґент хору бул Александер Планкош, а медзи двома блоками наступел и млади виртуоз на гармоники Пальо Гасин.
Внєдзелю, 4. октобра, у предполадньових годзинох коцурски хор шпивал на Служби Божей у Грекокатолїцкей церкви блаженого Василя Гопки у Снїни. У присустве велького числа вирних, Службу Божу вєдно служели домашнї парох о. Данил Шаришски и парох коцурски о. Владислав Рац.
Пополадню, истого дня, у Будинку култури места Снїна отримани XXXIV Фестивал духовней писнї. З привитнима словами госцох и учаснїкох Фестивалу поздравел предсидатель Союзу Русинох-Українцох Словацкей Републики Павло Боґдан, вицеконзул Ґенералного конзулату України у Пряшове Марина Мищенко и городоначалнїк места Снїна Петер Волошин.
У уметнїцкей програми Фестивалу участвовали 7 творчи колективи зоз Словацкей, України и Сербиї. Словацку представели 4 творчи колективи: Шпивацки колектив при храме Успения Пресвятей Богородици у Рускей Поруби, Здружени хор при Римокатолїцкей парохиї Святого Хреста у Снїни, Фолклорна ґрупа „Старинчанка” (Снїна) и Здружени шпивацки колектив „Стужица” Снїна – „Дуброва” Зубне – „Шинява” Снїна. Україну представели: Народни вокални ансамбл „Арника” клубу валалу Тарнївци и Хор „Авґустин Волошин” грекокатолїцкого катедралного храму у Ужгородзе.
Сербию представел Хор при грекокатолїцкей церкви Успения Пресвятей Богородици з Коцура. Вони под дириґентством Александра Планкоша одшпивали штири писнї: Богородице Дїво, Хвалите Господа с небес, Иже Херувими и Свят, свят.
До Снїни у Словацкей коцурски хористи одпутовали у орґанизациї Союзу Руснацох Українцох Сербиї, партнерскей орґанизациї Союзу Русинох-Українцох Словацкей Републики, котра традицийно главни орґанизатор того фестивала. Вони там пребували о трошку домашнього Союзу, а финансийни средства за одход до Словацкей обезпечела општина Вербас.
На поволанку орґанизатора, на Фестивалє у Снїни бул и представнїк Союзу Руснацох Українцох Сербиї Микола М. Цап, котри мал вецей розгварки з домашнїма орґанизаторами, дзе окремни акцент дати на будуци манифестациї на котрих тиж буду участвовац и нашо аматере.
