Питанє з наслова ми пришло на розум єдного цалком обичного рана, кед сом хто зна по хтори раз преверйовала порученя и обвисценя док сом пила свою раншу кафу. Роздумовала сом о тим же бим могла пробовац тото цо ми випатра нєможлїве – препровадзиц цали дзень без телефона хтори ми обично вше при руки накадзи отворим очи. Кажде рано перше преверюєм дружтвени мрежи, обвисценя, аж и теди кед за тото наисце нєт потреби. Прето сом того рана, хторе пахло на швижу кафу и цепле лєто, одлучела же телефон охабим на столє и до вечара го нє вежнєм.
На початку ми було нєзвичайно.
Вецей раз сом по автоматизму рушела ґу телефону, алє вецка сом ше застановела и здогадла же цо сом одлучела. Знам же то, у ствари, мойо звикнуце. Место же бим вжала телефон до руки, направела сом себе фриштик и шедла наєсц ше на мире. Познєйше сом пошорела обисце, пущела музику и пренашла сом час за ствари хтори лєм одкладам „прето же нє мам часу”. Читала сом кнїжку, одпочивала, рихтала сом себе облюбени полудзенок – єдноставно сом уживала у тим же нїґдзе нє мушим понагляц.
Найбаржей ше ми пачело, у ствари, як любим цихосц. Без рижних обвисценьох, порученьох, бренканя телефона, мала сом чувство же ми дзень вельо длугши. Одразу сом мала часу за роздумованє, мала сом часу одпочинуц ше и буц сама зоз своїма думками.
Як дзень преходзел, пополадню сом ше надумала пойсц прешейтац.
Без телефона сом анї нє могла задумац висц зоз обисца, прето же:
„Га, як же ше будзем даґдзе сликовац? Як будзем преверйовац чи ше дацо нове случело на интернету?”
Алє, праве прето сом могла баржей обрациц увагу на швет коло себе, хто преходзи, кого стретнєм, як ше людзе справую. Могла сом обачиц ствари коло хторих бим зоз телефоном у рукох можебуц лєм прешла и нє обачела их.
Кед уж пришол вечар, похопела сом же ми телефон вообще нє хибел тельо кельо сом очековала же будзе. Дзень ми прешол мирно, без понагляня, без потреби же бим була доступна у каждей хвильки. И, знаце цо интересантне? Нє мала сом тоту потребу мац телефон у руки без причини.
Кед сом вжала телефон зоз стола, дочекали ме порученя и рижни обвисценя. Препатрела сом шицко, алє сом нє мала чувство же сом дацо важне препущела.
Єден дзень без телефона нє пременєл мой живот, алє ми указал же нє мушим буц цали час повязана зоз екраном. Дакеди досц склонїц телефон и пошвециц ше себе и швету коло себе.