ЛОНДОН – Од нєшка ше на Шветовим першенству у атлетики буду змагац найлєпши атлетичаре на швеце. Першенство будзе отримане од 4–13. авґуст, а на нїм наступи и Михаил Дудаш у дисциплини дзешецбой.
Дудаш норму за тото змаганє виборел пред роком на Державним першенстве у дзешецбою, а потим форму потвердзел на Европским першенстве у Амстердаму, та є звекшого порихтани за, наздава ше, добри резулати. Тогорочни пририхтованя були кус иншаки, а условия за тренинґ, блїзко при Лондону, таки яки треба же би були.
Дудаш ше будзе змагац 11. и 12. авґуста (пияток и собота). Пияток го чека обегованє на 100 метери (11 г.), скаканє до далєка (12,05 г.), руцанє кулї (13,05 г.), скаканє до висока (18 г.) и обегованє на 400 метери (21,45 г.).
На соботу буду змаганя у дисциплинох обегованє на 110 метери з препреченями (11 г.), руцанє диска (12 г.), скаканє з палїцу (15,15 г.), руцанє копиї (18,30 г.) и обегованє на 1 500 метери (21,45 г.).