Нови Сад вєдно зоз Беоґрадом, Нишом и Суботицу найвекше будовалїще у Сербиї – нє лєм будинкох зоз квартелями, алє и провадзацей инфраструктури. Цале лєто ше меняло циви за далїнске зогриванє, оправя ше драги, а длугорочне жаданє, Жежельов мост, вше блїжей при концу.
У Новим Садзе мушице ше добре знаходзиц и буц сперпезлїви, бо ше улїци за транспорт нєпреривно завера и розкопує. Пешаком охабени узки преходи, а вожаче на автомобилох часто муша керовац цали часци города же би сцигли на одредзиско.
МЕСТО КЕРПЕНЯ НОВИ АСФАЛТ
Прешлого викенду У Петроварадину отворена Прерадовичова драга у Варощику, од Варадинского моста по крижну драгу у Рельковичовей улїци. Драга була за транспорт була заварта вецей як мешац и виволовала прави гаос. Гоч є анї нє закончена до конца, пущена є до обтоку и приходзи до вираженя єй функционалносц. Но, исто так, достала и нови випатрунок. Роботи виводзело ЯКП „Пут”.
– Нєпреривно нас критикую же лєм платаме драги и керпиме драги. Ниа, после асфалтованя драги на Сайлову коло теметова, тераз зме поробели и драгу у Петроварадину. Прелята є з новим асфалтом, обложена зоз бетонскима рубцами и цегелками. Поробена и одлївна система, котра найопаснєйша за сам асфалт, бо го нагриза и знїщує. Прелївац драги, а нє платац, циль шицким нам и док будзе достаточно средства у каси, ми то дзечнє будземе робиц. Шицким ше пачи и Сайлово и Петроварадин, ровна драга ше пачи и нам. Свидоми зме же кед платаме драги, ми их лєм платаме, и же проблем лєм предлужеєме, алє затераз так мушиц буц – гвари Биляна Чубич, подпаролка ЯКП „Пут”.
ПАРТИЗАНСКА ОЗНОВА РОЗКОПАНА
После шеснац рокох, Партизанска улїца, єдна зоз найфреквенттнєйших улїцох у Новим Садзе, преширена и виасфалтована, даскельо раз є преправяна, керпена, асфалтована. Пред двома роками поробени єй лїви бок, од Темеринскей ґу Сентандрейскей драги. Пред трома тижнями „Пут инвест” почал фундаментални роботи на єй правим боку, зняти асфалт и подлога груба коло метер и пол, и ознова ше почало навожиц писок и каменьче. Так повесц, роби ше од початку.
Фаховци и пред шеснац роками твердзели же драга добре поробена, же витри ма обтерхованя чежких камионих. По ґенералним урбанистичним плану Нового Саду, чежки камиони требали достац нову маршруту, керовац ширши центер Нового Саду. Медзитим, од того плана найвироятнєйше нє будзе нїч, драга препадла же ше ю муши ознова поробиц.
Но, фреквентносц камионох така же розбита драга, и далєй буду ходзиц по Партизанскей улїци, понеже заобиходнїца за нїх нє направена. Там дзе требала буц драга за нїх, направени нови хижи и їх одкуп вецей нє приходзи до огляду.
ЦИВИ ВЖИМЕ ПУКАЮ
Же би цепловодни циви нє пукали вжиме, у штред сезони зогриваня, як цо ше то часто зна случовац, реконструкция ше окончує влєце. Найвекша робота ЯКП „Новосадскей топярнї” бул главни вод през Булевар ошлєбодзедня. Розкопани є ище влєце, у штред найвекших горучавох. Гоч условия були нєвигодни, з тепературу прейґ штерацец ступнї, роботи добре цекли.
Цо найважнєйше, були зме шведкове викопаних ардзавих цивох. Кед би остали и тей жими, бул би вельки ризик чи би витримали жиму.
Ивана Станимирович, подпаролка ЯКП „Новосадскей топярнї” Нови Сад гвари же гражданох интересує чи циви буду заменєни по нову сезону.
– То добре же ше гражданє Нового Саду интересую о роботох поставяню нового цивоводу, и най такой повем же тоти роботи закончени. Тото же Нови Сад розкопани, то лєм закончуюци роботи. „Топярня” ше добре рихта и за тоту сезону. Поставяме квалилтетнєйше циви як цо були тоти потераз, тиж и технолоґия усовершенша и требали би буц сиґурнєйши и длужей служиц. Окрем главного воду на Булевару ошлєбодзеня, пременєли зме и 10 километри циви у других улїцох, ремонтовали шахти и приключки, насампредз подстанїци у будинкох. Шицко би то требало допринєсц же би зме нову сезону дочекали зоз цо менєй гавариями – гвари Ивана Станимирович.
Наша себешеднїца наглашує же, и кед би почала сезона под час роботох, дзекуюци новей технолоґиї, прецек цеплей води би бул нормални и квартелї би ше зогривало.
ПОВЯЗОВАНЄ ПОБРЕЖЙОХ
Жежельов мост звалєни 1999. року у НАТО бомбардованю, о даскельо мешаци поставени монтажно-демонтажни мост по котрим ше и нєшка зменюю гайзибани и чежки камиони. Нови мост ше почало правиц у януару 2011. року, цена по спрам предрахункох була коло 45,3 милиони евра, Европска уния проєкт финансовала зоз 26,2 милионами еврами, Покраїна Войводина зоз 14,7 милионами и Нови Сад зоз 7,4 милионами евра. У медзичаше, пременяни виводзаче одуставали роботох, напущовали будовалїще, роботи по даскельо мешаци були цалком претаргнути, а того лєта ше анґажовала покраїнска и републична влада и роботи добре напредую. Отверанє моста ше обчекує на концу идуцого, 2018. року.
Док ше поставя мост, роби ше и приступни драги ґу мосту, односно ушорює цалу тоту часц. Новосадянє нє можу дочекац свой треци мост.
РЕКОРДИ
Дакедишнї Жежельов мост ше будовало од 1957. по 1961. рок, и у тим чаше бул по велїм койчим рекордер. Бул драгови и гайзибански, бул длугоки 446 метери, широки 21,50 метери, теди бул други по велькосци у швеце, а найвекши тей файти у Европи. Мал лєм єдну гайзибанску драгу. Нови мост будзе мац два, и нє будзе гамовац гайзибански транспорт.
ИНДУСТРИЙНИ БУДОВАЛЇЩА
После длугшого периоду Нови Сад уходзи до фази инвестицийох и економского розвою. Зоз заєднїцкима моцами и средствами Войводини и Нового Саду, у городу
отворени даскельо вельки индустрийни будовалїща. Намаганє инвеститорох же би нови роботни места були вельо квалификованши, односно лєпше плацени як цо то части случаї у Сербиї.
