НОВИ САД – За перши тогорочни осем мешаци цалосна звонкатарґовинска черанка аґрарних продуктох Републики Сербиї була 3,24 милиярди долари, а вредносц вивозу аґрарних продуктох виноши 2,2 милиярди долари, цо звекшанє за 6,5 одсто у одношеню на исти час влонї. Войводина витворела 36,5 одсто з цалосного вивозу.
– Вредносц вивозу аґрарних продуктох за 4,2 раз векша од вредносци увежених, а покритосц увозу з вивозом у одношеню на исти час прешлого року у Войводини звекшани за 15 одсто – гварел предсидатель Привредней комори Войводини Бошко Вучуревич и додал же у звонкатарґовинскей черанки Войводина витворела суфицит од 729,7 милиони динари, а у цалосним вивозу жеми участвує з 26,7 одсто.
З Войводини ше найвецей вивожи меркантилну кукурицу (20 одсто у цалосним вивозу), у вредносци од 191,2 милиони долари, цукер, у вредносци од 64,8 милиони долари, слунечнїков олєй, у вредносци од 41,4 милиони долари и жито, у вредносци од 36,5 милиони долари. Рост вивозу аґрарних продуктох ше и далєй витворює з вовозом кукурици.