РУСКИ КЕРЕСТУР/ВЕЛЬКА ПЛАНА – Семенска хижа „Супериор сид” з Велькей Плани и того року, 28. и 29. юлия, орґанизовала дводньову манифестацию Днї польох Супериору, на котру були поволани и рускокерестурски паприґаре зоз Здруженя паприґарох „Капсикум анум”.
Керестурски паприґаре були на манифестациї другого дня, дзе видзели продукцию семенскей желєняви на єдней часци од вкупно 50 гектарох власней продукциї Супериору. Паприґаре видзели и нови файти паприґи, та и надалєко познату и преславену сорту „Слоново ухо” на домашнїм терену, котре ше уж роками удатно продукує и у Керестуре.
Попри тим, присуствовали и на Вистави желєнявових продуктох, а могли участвовац и у тимским бависку „Глєданє скритого блага”.
По законченю розпатраня оглядних польох и продуктох, за шицких госцох бул орґанизовани полудзенок и вешелє з музику.