РУСКИ КЕРЕСТУР – Вчера, 13. юния, Месна заєднїца Руски Керестур орґанизовала добродзечну роботну акцию з хтору очисцени керестурски базен, а кажди рок ше ю отримує на концу школского рока.
Як и на скорейших, и на тогорочней акциї участвовали велї млади Керестурци, найвецей школяре висших класох ОШ, котрим за тоту роботу оправдане виоставанє з настави остатнї дзень школи, а на акциї участвовали и дзивчата. Роботу на чисценю базену предводзел наставнїк у керестурскей Школи Славко Пап.
Пред роботу, ЯКП „Руском” на базену покошело траву, за акцию обезпечело трактор и приколицу за вивоженє шмеца, а присуствовали и його пецеро роботнїки.
На концу члени керестурского Добродзечного огньогасного дружтва базен вимили з чисту воду, а „Руском” го дезинфиковал з хлором.
Акцию потримали ЯП „Води Войводини” и члени Здруженє спортских рибарох „Коляк”, у чиїм лєтнїковцу на базену за акцияшох Месна заєднїца пририхтала полудзенок, а по законченю тей велькей роботи такой було и купачох.