НОВИ САД – Познати новосадски дизайнер Йован Тркуля будзе уметнїцки директор проєкту „Нови Сад 2021 – Европска престолнїца култури” (ЕПК). Уметнїцки директор єдна зоз найзначнєйших особох котри креирую и реализую проєкт ЕПК, понеже ма задаток, у сотруднїцтве з Уметнїцки совитом, обдумац цалосну уметнїцку програму хтора будзе виведзена у рамикох проєкту „Нови Сад 2021- Европска престолнїца култури”.
Як з тей нагоди сообщене з Фондациї „Нови Сад 2021 – ЕПК”, Йован Тркуля визначни креативни директор у реґиону, з вецей як 15 роки искуства у културней и креативней индустриї и з численима контактами у културно-креативним секторе по цалей Европи. Єден є з найнаградзованших уметнїкох у тей обласци, ма и медзинародне искуство у реализованю проєктох у сучасней уметносци, дизайну, креированю и руководзеню з брендами, у розвою публики, стратеґийного планованя и розвою уметнїцкого концепту.
Йован Тркуля прешлого року победзел на конкурсу за идейне ришенє визуалного идентитету проєкту „Нови Сад 2021”. Наступни крочай проєкту будзе вибор и програмного директора.