Дина Мудрох зоз Нового Саду, школярка першей класи Карловацкей ґимназиї, а одмалючка тренира джез балет. Успишна є у тим танцу, уж 10 роки тренира и наступа по рижних местох у Сербиї, алє и у иножемстве. Прешлого року участвовала на фестивалу ,,Dance fest ovi Sad”, котри єден з найвекших медзинародних фестивалох у Новим Садзе и Сербиї. Ту наступала зоз соло хореоґафию, а змагала ше зоз дванацерима учашнїками зоз иножемства Джез балет, лєбо модерни танєц – то мишанїна класичного балету, хип хопа и ґимнастики. Дина гвари же пред джез балетом ходзела на ритмичну ґимнастику дзе учели танцовац хореоґрафиї, так же вона уж на даяки способ була порихтана за джез балет, и прето єй го нє було чежко звладац.
– Мала сом пейц роки кед сом почала тренирац джез балет. Пайташка уж ходзела на танєц, та сом зоз ню першираз пошла на тренинґ, и такой ше ми и попачело. Тренирам у танєчним клубу „Партизан 2”, єст нас 11 дзивчата, а маме тренинґи штири раз до тижня. Пред тим як цо почнєме робиц на хореоґрафиї, мушиме направиц даяки комбинациї котри треба звладац, потим шицко тото вежбаме и робиме зоз музику. Маме надосц тренинґи на котрих ше рихтаме за змаганя, а робиме и вежби за змоцнованє цела, потим бежиме, и аж вец починаме зоз комбинациями хореоґрафийох. Треба нам дас пол годзини же бизме ше зограли за тренинґ. Хореоґрафию рихтаме дас три мешаци, звичайно од януара починаме же бизме ше порихтали за змаганє котре ше отримує у марцу або априлу, понеже ше теди отримую найвекши змаганя – толкує Дина.
НАЙЛЄПШЕ ПОЧАЦ ОДМАЛЮЧКА
Джез балет найлєпше тренирац одмалючка, прето же го вец лєгчейше усовершиц, а и швидше ше звикнє на крочаї у танцу. Тренирац можу и старши, алє за тото потребне вельки усиловносци и порядно ходзиц на проби. У познєйших рокох професийни танєц дакус чежше учиц.
Кед ше тренира одмалючка и трему ше лєгчейше превозидзе, прето же особа длугши час ма пракси, нє лєм у танцу, алє и на явним наступу.
– Пред наступом нє мам трему. Дараз ю почувствуєм даяки два минути пред тим як цо видзем на сцену, алє уж сом ше звикла на тото. Накадзи видзем пред публику шицко прейдзе, на шицко забудзем, а кед ше случи же ше побунїм, наприклад, кед танцуєм соло, вец сама импровизуєм и лєм предлужим далєй. Кед сом у ґрупи попатрим на пайташку. Анї случайно ше нє шме обачиц же ши направел даяку гришку, бо жири однєє боди и кед ци ше уда ,,вицагнуц’’ зоз гришки, вец и жири толерантни – гвари Дина.
Младим танцошом важне дац нагоду наступац, путовац и преширйовац свойо горизонти през медиї танцу. Дина з ґрупу участвовала на рижних змаганьох у Сербиї и иножемстве, у Австриї, Италиї, и Горватскей. Найважнєйша награда котру достала було треце место на шветовим першенстве у Горватскей кед мала лєм 10 роки, там танцовала у ґрупи зоз ище штирома дзивчатми. Єдно зоз єй милих змаганьох, то кед прешлого року танцовала соло и була друга на державним змаганю у Сербиї. Прешлого року участвовала на „Dance fest Novi Sad” на єдним з медзинародних фестивалох у Сербиї, у Новим Садзе дзе приходза танцоше з иножемства, як наприклад, хип хопере, джез балерини, а танцує ше класични балет и ище вельо файти танцу.
– За мнє то було єдно фине и вельке искуство, понеже сом теди достала соло точку и танцовала сом сама на сцени процих дванацецерих змагательох. На змаганю була велька конкуренция понеже було досц людзох з иножемства. До „Ґала вечара” войду 20 хореоґрафиї, а прешлого року найвекша награда була 3 500 евра, достало ю перше место. Кажде у жирию иншеоценьовал: дахто випатрунок, дахто танєц а дахто технїку. На тим фестивалу сом од дванацецерих була пията – приповеда наша собешеднїца.
ТАНЦОВАНЄ ЛЄМ ГОБИ
Танцоше з You Tuba на котрих ше упатра и котри єй даваю инспирацию то Briar Nolet, Lucy Valelly, прето же їх технїка безпрекорна, од нїх мож вельо того научиц, а и сами вони даваю совити другим танцошом. Дина досц вязана за танєц, и то єй облюбена файта спорту, алє вона танєц видзи лєм як гоби, бо дума же ше то, нє баш виплаци, и же нєт перспективи од нього у держави у котрей жиє.
– Сцем предлужиц тренирац докля ґод можем, то часц мойого живота. Кед бим ше сцела ище озбильнєйше занїмац зоз танцом, вироятнє же бим предлужела у иножемстве, понеже у Сербиї танєц нє барз припознати. Индзей мож посцигнуц векши успих, и танєц ше баржей ценї як у нашей держави, а єст и нагоди лєпше ше усовершац – заключує Дина.
