Коренї цагаю, а судьба зроби свойо

автор сас
1k Опатрене

До Австралиї пошол як млади леґинь пред вецей як штерацец роками. Од теди на вецей  заводи жил и там,  и у родзеним Дюрдьове. Коренї го вше цалаги дому, и до Войводини, алє и на Закарпатє. Пред двома роками пришол жиц до Дюрдьова, алє нє зна же чи ту и останє

Зоз жаданьом започац нови живот и витвориц ше, Михал Чакан 8. мая 1972. року рушел до Австралиї, котру у тим периодзе насельовали гражданє з велїх державох, а кажде мал свойо причини.

– Кажде мал даяки обчекованя и потреби, социялни або политични нєзадовольства або нєскладаня, и велї ше пренашли у дачим. И я мал свойо прешвеченя – гварел Михал Чакан, котрого у Дюрдьове пре державу у котрей длуго жил наволали – Кенґур.

НЄТ ЦО НЄ РОБЕЛ

Перше одпутовал до Австриї, а потим драгу предлужел до Италиї. З Дєнови одпутовал за Австралию и бул єден од 500 путнїкох на ладї „Ґалилео”. На драги по Перт, у Заходней Австралиї дзе ше и упутел, на кажди три-штири днї ставали вше у другим месце. Теди мал нагоду видзиц Напуль, Месину, Тенерифи, Канарски острова и Кептон. Остатня станїца му була у луки Фримантле у Перту, одкаль го одвезли до населєня, до кампу, дзе жил з другима роботнїками. Швидко достал роботу як месар, алє робел у вецей местох розлични роботи и на вецей заводи ше селєл. Город Перт го найвецей прицаговал.

– Кед сом ше врацел до Заходней Австралиї, робиц у желєзарнї, вельо ше робело, а робота була чежка, алє дакеди сом нє мал вибор – щири Чакан. До Дюрдьова першираз пришол о штири роки, и затримал ше у валалє пол рока.

– Шицки ми розлично думаме и маме иншаки потреби у датей хвильки або периодзе, а обставини, стан и ситуация, та и околїско у котрим жиєме уплївую на нашо потреби, чувства и на наш способ роздумованя. Надумал сом ше варциц до Австралиї – гварел Михал. Роботу вше глєдал у провинциї, бо му ше вельки вароши нїґда нє пачели. По його словох у Австралиї людзе часто меняю роботу, там ше баржей почитую резултати як факт же дахто даґдзе длуго робел. Так у месце Калґула Бордел, робел у двох рудокопох и под жему и на поверхносци. Там найволєл робиц, бо було вельо роботнїкох странцох, добре дружтво, та ше и крашнє дружели. Робел и на фарми догану, у овоцнїкох, резал цукров над, правел чумур, гонєл камион и оправял драги, та робел аж  и у розпущовальнї злата, на млїнох дзе ше роздзельовало метал од блата. Лєгко и швидко научел по анґлийски, а по руски лєм даскельо раз бешедовал. У Адалайди нащивел родзину Михала Мудрового и стретал ше з товаришом Якимом Пастонїцким котри до истого места сцигол лєм мешац пред тим як вон. 

МОЖЕБУЦ ШЛЇДУЮЦА ДЕСТИНАЦИЯ – ГОРНЇЦА

До Дюрдьова ше врацел влєце 2016. року. На таке ше одлучел бо му там найблїзши, гоч велї уж нє медзи нами. Гвари же нє зна чи останє у валалє, бо, як гвари, людзе вшадзи подобни.

– Каждого цага там одкаль його коренї. Прето сом уж два раз нащивел Україну и Закарпатє – Ужгород, Перечину и Мукачево Нє виключене же там пойдзем жиц, бо док нє знам точно яка будзе ситуация зо мну, и то можлїве. У Сербиї ше чувствуєм як странєц, а у Перечинє сом якош шлєбоднєйши, як медзи своїма – гварел Чакан.

З роками ше живот и потреби пременєли, алє Михал вше любел путовац и упознавац нови култури, видзиц рижни файти уметносци. У шицких местох дзе жил куповал розгляднїци на котрих видно тамтейшу природу и тото цо значне за одредзени край або место. Куповал партки на котрих вирисовани пририодни богатства єдного места, куповал ручни роботи и рисунки. Напатрел ше шицкого, и гвари, требало тото шицко витримац, бо нє могол вше дойсц до роботи. Року 1997. ше похорел на шерцо, а о три роки пошол до инвалидскей пензиї. И далєй го нє тримало место. На вецей заводи ше врацал до Дюрдьова, помагал родичом и обрабял жем, алє ше врацал и до Австралиї.

– Нїхто до Австралиї нє пошол з любови ґу иножемству, алє пре даяку потребу. Дахто пошол з даяким прешвеченьом, або прето бо мушел.

Тераз мам 66 роки и вельо того сом прежил и видзел. Анї ту, анї там, нє идеални условия за живот. Вшадзи у швеце єст и доброго и нєдоброго, а и ту и там сом єдинка, и одвитуєм лєм за себе. Та заш лєм, думам же лєгчейше кед двойо през живот крачаю. Теди ше чловек баржей намага напредовац, бо ма з ким дзелїц живот, правду, нєправду, добре и зле. Теди шицко ма красши смисел, та и путованя – заключує Михал Чакан.

9

ХИЖИ, УГЛАВНИМ, НА КРЕДИТ

По його думаню клима у Сербиї идеална, як и у Торину, Милану, Заґребу, Любляни, а условия за живот добри и од того, як гвари Михал, лєпше нєт. Нє лєм за живот, алє и за туризем, док Австралия богата и розвита жем, ма вельки рудово богатства, розвиту польопривреду, лєсарство, овоцарство, риболов и други конари.

– Кед зме там пошли, мой пайташ Пастонїцки прекоментаровал же исти заробок мал и у Сербиї. З часом ше условия злєпшали, тераз там майстрове як цо механїчаре, або електричаре добре зарабяю, 60-70 долари на годзину. Минимални заробок 17 долари на годзину, кафа у карчми коло 5 долари, а шкатулка циґаретлох 25 долари – толкує Чакан и припомина же и там велї людзе купую у китайскох дутянох, а хижи и порти у Австралиї драги, та их углавним купую на кредит на 30 або 40 роки, а одплацованє часто нашлїдза дзеци, цо у нїх цалком нормалне.

Так о своєй животней драги, алє и искуствох назбераних за штири децениї приповеда Михал Чакан. Гвари же придзе час кед ознова одлучи кадзи далєй… Прешвечени є же ше судьба заш лєм о шицким остара.

ПОСЛЕ ИҐРАНКОХ ЮҐО-КЛУБ

И у Австралиї ше дакеди орґанизовали иґранки, кед их вецей нє було, найвецей нащивйовал Юґо клуб дзе ше зиходзели Югословенє и дзе ше пестовала традицийна музика, шпиванка и танєц. У Перту було вельо Босанцох, Македонцох, Горватох, Словенцох, Сербох и других та ше случовало же и по рок нє бешедовал по английски. Исновали и рижни клуби Гречески, Италиянски и други.

КАЛАП АБО ШУБАРА И ДОБРА ЦИПЕЛА

У Дюрдьове шицки знаю же Михал Чаканов нїґда нє виходзи на улїцу без калапа, а вжиме без чарней шубари. З Австралиї принєсол два пари скоряних квалитетних ципелох и три калапи зоз кенґуровей шерсци.

– Мам святочни калапи и за кажди дзень, за даєдни сом робел и до тижня. Хто люби и з зна дацо о калапох може охаракеровац особу на основи його калапа, гварел Михал Чакан. У Дюрдьове, кед у обисцу нє ма майстрох новини

найволї читац у карчми у парку у центре Дюрдьова. Гвари же би му з пару було шицко лєпше и лєгчейше. Теди ше чловек баржей намага напредовац, бо ма з ким дзелїц живот, правду, нєправду, добре и зле. Теди би шицко ма лєпши змисел, та и путованя.

30

 

ПОВЯЗАНИ ТЕКСТИ