РУСКИ КЕРЕСТУР – Нєшка пополадню, коло 18 годзин, у центру Руского Керестура опрез будинку Пошти, пришло до транспортного нєщесца.
Як зме нєурядово дознали, до нєщесца пришло кед превозка, хтора ишла з напряму Лалитю до Кули, вдерела до паркованей приколици з ґереґами. Гоч приколица нє була паркована цалком при драги, пре другу превозку хтора ишла з процивного напряму и сцела скруциц, вожач превозки хтора вдерела до приколици пробовал обкеровац, и найвироятнєйше пре векшу швидкосц вдерел до приколици и нательо ю загнал же приколица после нєщесца була паралелно зоз драгу а скоро шицки ґереґи закончели на жеми и у ярку. Барз вельке щесце же под час инциденту коло приколици нє було нїкого.
На терен такой вишла полиция хтора окончела вишлїдзованє, як и керестурски огньогасци, хтори такой поумивали драгу, а окрем материялней чкоди, покалїчених на щесце нє було.
