НОВИ САД – Волонтере Каритасу зоз Коцура, на чолє зоз ш. Михаїлу, на Вознесениє Господнє, 17. мая були на Служби Божей у церкви св. апостолох Петра и Павла у Новим Садзе, а потим и у церковней сали на друженю и чераню искуствох, дзе их привитали парох о. Юлиян Рац, парохиянє, члени Културней ради и Церковного одбору.
– Зоз своїм вознесеньом, Исус Христос до нєба однєсол и людску природу, хтору обоготворел – гварел о. Рац. – Пошол приготовиц нам место, а ми треба же бизме жили по волї Божей. Вон дал Церкви мандат же би ше розширела по цалим швеце. Исус нам дал задаток шириц любов, а опредзелєнє за Бога значи и жертву за ближнього.
Нє лєгко орґанизовац волонтерох, окреме у городским штредку, а вельо значи и анґажованє монахиньох. Будземе ше учиц на прикладох волонтерства у Руским Керестуре и Коцуре – заключел о. Рац.
Монахиня Михаїла наглашела же маме 15-рочнїцу нашого Еґзархату, а то плоди нашого заєднїцтва.
– Тоти 16 волонтере зоз Коцура, хтори тераз пришли, то основа, слуп нашей роботи – гварела шестра. – Вони видвоюю час, труд и маю християнску любов. Маме велї акциї и активносци, нє лєгко то шицко поробиц, алє маме добру дзеку, та вец и резултати.
На концу, ш. Михаїла даровала Новосадяном ґаґорки и поволала их до Коцура до нащиви.
