ВОЙВОДИНА – Шицким вирним котри славя швето народзеня Исуса Христа по григориянским календаре вчера упутели щири винчованки, попри предсидателя Републики Сербиї Александра Вучича, премиєрка Влади Ана Брнабич и други министрове, як и чолнїки општинох у хторих вирни славя тото швето.
Городоначалнїк Нового Саду Милош Вучевич пожадал же би у каждей фамели пановал мир, а же би крачунске порученє остало у наших думкох и шерцох.
Предсидатель Општини Вербас Милан Ґлушац свою крачунску винчованку послал вєдно зоз предсидательку СО Вербас Маряну Мараш у хторей здогадли же порозуменє и злога єдно з найвекших жридлох радосци. Прето поручели шицким вирним же би тоту радосц подзелєли з найблїзшима.
И предсидатель Дочасового орґану Општини Кула Велибор Милоїчич повинчовал Крачун и здогаднул же тото швето нагода здогаднуц ше же зме дружтво хторе пестує розличносци з медзисобним почитованьом и порозуменьом.
Чедомир Божич, предсидатель Општини Жабель, свою крачунску винчованку послал шицким вирним котри тото швето славя по григориянским календаре з надїю же им Крачун принєше мир и благостанє.