ПАНОНИЯ/РУСКИ КЕРЕСТУР – Презентациї надалєко познатей нємецкей компаниї „Kühne”, котра отримана на Панониї 8. марца, присуствовали и штверо представнїки Здруженя паприґарох „Капсикум анум” – Душица Орос, Михайло Чизмар, Славка Медєши и Михайло Пап.
Спомнута компания представела свою дїялносц, дзе су на сербским тарґовищу роками препознати як озбильни одкупйоваче корнишонох. Часточно же занїмаю з одкупом єдней файти желєней паприґи, а розпатрана и можлївосц сотруднїцтва з керестурскима паприґарами.
За тераз, понукли контаречнє продукциї корнишонох, по ґаздовстве максималней поверхносци 10 ари. Компания би финансовала цалосну продукцию, а одплацанє плановане аж од трецого тижня у одкупе. Цени точно дефиновани, а кед би ше у Керестуре назберало достаточне число контрактох, постої можлївосц же принєшу машину за класованє корнишонох.
Заинтересовани треба же би ше явели Душици Оросовей, найпознейше по 31. марец.