Найчастейше на наднїцу, найлєпше до иножемства

1.3k Опатрене

Кед ше спатра шицки можлївосци за сезонски роботи, виходзи же єст наисце рижнородни опциї, алє су нє шицки єднак популарни и процагуюци младей челядзи

Попреходзели матури, испитни роки и примаци испити, позакончовани фестивали, та пред школску и академску младежу два можлївосци цо робиц у штред лєта. Лєбо ше одпочивац и чекац єшень, лєбо пробовац заробиц за одпочивок и лєгчейшу студентску єшень.

У ХОТАРЕ ВШЕ ТРЕБА ВРЕДНИХ

Же би розтерховали буджет у обисцу, алє и мали себе за трошок, розвагу або за факултет, у Дюрдьове под час лєтнього розпуста млади найчастейше зарабяю на наднїци на полю, або одходза до иножемства. Од прешлого лєта у валалє ше навелько почало садзиц огурки хтори вимагаю вельо ручней роботи, та коло нїх анґажоване найвецей младих наднїчарох. Пред тим, алє у меншим обсягу, найвецей роботи могло найсц коло малинох. Окоповац поля, пресадзовац або робиц чежши „кубикашски” роботи зоз видлами и лопату лапаю ше  углавним старши, искусни наднїчаре.  Под час сезони обераня огуркох и малинох у юнию и юлию єст найвецей потреби за наднїчарами. Теди за першу змену потребне коло 190 особи, за огурки коло 170, и ище коло 20 особи за малини, и ґу тому, роботней моци треба и за други польопривредни роботи. За другу змену потребне  30 одсто менєй наднїчарох. Наднїцу у Дюрдьове плаца коло 180 динари на годзину, а чежши роботи, котри робя преважно старши, медзи 200 и 220 динари.

Медзи першима огурки навелько почал садзиц  Дарко Михайловски, хтори на наднїци ма найвецей особи з фамелию, алє и младих. Наймладши му петнацрочни наднїчаре, а найвецей єст  младих медзи двацец и двацец два роки. Углавним шицки маю жаданє робиц по конєц сезони.

– И старши и младши добре робя, алє младши любя длужей спац та их у поради з нїма положиме до другей змени. Так после роботи вечар ище сцигню и до центру, бо ше роби од 13 до 21 годзин. Коло роботи слухам цо приповедаю, о тим же за цо шпорую – углавним за розвагу, за морйо, даєдни за патики, фодбалере за копачки. На початку сезони сом на два тижнї до наднїци приял два дзивчата. Було ми нєзвичайнее же глєдали так кратко робиц, алє ми було мило чуц кед потолковали же за тот час назбераю за дарунок котри жадаю купиц товаришки – приповеда Дарко Михайловски.

З другого боку, млади Дюрдьовчанє гваря же хто сце, може заробиц на наднїци на валалє, алє векши пенєж мож обчековац лєм у иножемстве.

Петнацрочна Александра Раґаї на єшень руши до першей класи Економскей школи у Жаблю. Того лєта першираз почала ходзиц оберац огурки. Гвари же єст досц младих котри робя през розпуст, алє и гевтих котрим хиби дзека за роботу.

– Товаришка предложела же бизме почали ходзиц на наднїцу на огурки пристала сом и тераз нє бануєм. Забавно нам, а ище и заробиме. Любела бим робиц по конєц сезони. Ище вше нє знам дзе  потрошим заробене, будзем шпоровац та увидзим цо ми будзе потребне, гварела Александра Раґаї. Єй товаришки прешлих рокох ходзели и на паприґу и на цибулю, як и на малини, за котри гваря же их лєгчейше оберац як огурки.

Студент трецого року  на Правним Факултету у Новим Садзе Иван Михайловски, на наднїцу почал ходзиц влонї, того року роби од яри, а од юния каждодньово. Робел рижни роботи, гвари же нїґда нє виберал, а тераз и вон на огуркох Дума же млади у його рокох треба же би робели и здобували роботне звикнуце, же ше понукаю рижни можлївосци по каждим смаку, и же за забаву єст досц часу после роботи.

– Прешлого року сом шпоровал за морйо, а того року за драгу до Америки дзе плануєм робиц идуцого лєта. Док придзем назад, сиґурно уложим до дачого, любел бим започац свою роботу – планує Иван Михайловски.

На тот, лєбо гевтот способ, иножемство вше частейше у рижних калкулацийох младих Дюрдьовчаньох.

Його парняк Синиша Салак, абсолвент машинства на новосадским ФТН, влонї ше першираз одлучел пойсц робиц на три мешаци до Словацкей. Роботу нашол на интернету, а як и векшина наших людзох хтори иду до тей держави, робел за авто-индустрию, конкретно на вилїваню шофершайбнох. Як толкує, нє було му лєгко, алє швидше и вецей заробел як кед би у валалє ходзел на наднїцу.   

– На валалє млади влєце можу заробиц лєм на сезонских роботох у хотаре. Робота у Словацкей за мнє була добра нагода, бо сом за остатнї школски рок себе виплацел шицко цо ми було потребне за школованє. Єст младих котри жадаю заробиц, алє нє робя бо им хиби мотивация, односно обчекую заробок. Кед би ше дома звекшал стандард, млади би анї нє розумовали п одходу до иножемства – гвари Синиша Салак. Того року нє робел,  бо ше пририхтує закончиц факултет, цо себе з часци оможлївел праве и з влоньским одходом до Словацкей. Нє планує вецей робиц сезонски роботи. Як гвари, кед з диплому нє найдзе роботу у держави, професийну кариєру пробує будовац  у иножемстве.

ХЛАДЗАЛЬНЯ МА АЛТЕРНАТИВУ

 Окремне чувство и задовольство заробиц власни пенєж, а по можлївосци цо скорей, и цо кратше цалком завишиц од родительского бутєлара, зашпиваного  и од того цо родзина штури до кишенки за родзени дзень. Керестурска хладзальня „АБЦ ФУД” роками понукала роботу за сезонских роботнїкох, та ґенерациї младих Керестурцох там здобували перши роботни искуства, звикнуца  и плаци. Уж по законченей седмей класи основней школи могло достац сезонску роботу у Хладзальнї. У тих лєпших часох велї себе так заробели екстра динар за лєтованє, лєбо шопинґ. Нажаль, з приватизованьом Хладзальнї, потим з предликвидацийнима поступками, котри резултовали з меншима и нєпоряднима плацами, млади ше тераз ридко опредзелюю за сезонску роботу у Хладзальнї.  Гоч на перши погляд нє вше так випатра, у Керестуре млади можу и маю дзе индзей  заробиц свой динар през лєто.

Наприклад, узвичаєне же уж старши основци и штредньошколци  такой по концу школи орґанизовано одходза на наднїцу з бриґадирами, углавним на оламованє метолкох у семенскей кукурици.

– То робота присподобена младим, релативно є нє чежка, роби ше настояци, а найважнєйша точносц и педантносц. Правда, треба облєчиц шмати з длугокима рукавами, а попри тим и горучава у кукурици вельо векша як на отвореним, алє мож витримац – дознаваме од школярки трецей класи штреднєй школи Доротеи Тотовей. За осемгодзинови роботни дзень на метолкох звичайно ше зароби 1 400 – 1 500 динари

З оглядом на тото же лєто и сезона бостану, так у Керестуре на штирох местох у центру млади дзивчата зарабяю свою першу плацу.

– Предавам ґереґи уж по треци рок, приходзим зоз Сириґу як госцинска до баби и нини, мам ту товаришох з котрима ше чежко розиходзиме кажде лєто, медзи иншим, заробим себе тельо же ми останє дакус и за познєйше. Нїґда ми нє допито, а анї нє чежко, мойо задлуженє буц любезна и услужиц муштерию. По законченю роботи мам надосц шлєбодного часу, ходзим на базен, ходзели зме на Ноцни турнир у малим фодбалє… – приповеда школярки другей класи медицинскей школи Душанка Лукачова. Понеже робота чиста и у хладку, цена роботней годзини менша як индзей – од 100 по 130 динари на годзину.

17.07.2017.- Mladi -predavanje geregoh 002

Попри тим, вельке понуканє сезонских роботох и на полю, у заградох и пластенїкох керестурских польопривреднїкох и заградкарох, насампредз паприґарох. Од яри мож робиц у пластенїкох, а потим по конєц оберачки паприґи у хотаре,  на отвореним. Гоч наднїца на паприґи солидна – плаци ше 200 динари на годзину, роками хронїчни проблем у валалє же у штред сезони обераня нєт досц роботнїкох у валалє. З єдного боку, робота нє лєгка и млади ю пробую обкеровац кед мож, а з другого, паприґаре воля искуснєйших оберачох. Ґу тому, сезона уходзи и до початку школского и академского року, та у валалє єст менєй геверних. Медзитим, и вец мож заробиц пополаднями, кед ше пребера и реже паприґа, цо лєгчейше, а подєднак плацене.

Потим остава зберанє фолиї спод паприґи и одкладанє кукурици, а вец уж и єшень и други обовязки пре хтори „лєтнї” роботнїки дефинитивно закончую сезону.

 ВЕЦЕЙ МОЖЛЇВОСЦИ У ГОРОДУ

 Найлєгчейши и найпопуларнєйши способ заробку през лєто у Вербаше то робота у кафичох, сладолядарньох и других погосцительних обєктох. Влєце ше преширює капацитети змесценя госцох пре отверанє популарних и престраних лєтнїх заградох, кед рошнє и потреба за векшим числом роботнїкох. Кристина Фейса зоз Вербасу студира на Фармацеутским факултету у Новим Садзе и уж даскельо роки през лєто роби як келнерка.

– Робим штири або пейсц днї до тижня, а дньовнїцу мам тисяч динари. Бакшиш за осемгодзинову змену будзе обично до тисяч динари, кеди як. Прешлих рокох сом була и на морю, алє тераз сом ше одлучела остац дома, бо ше и у Вербаше глєда досц роботнїкох, а одвитую ми условия. Почала сом робиц концом маю и будзем робиц по октобер. Тельо тирва сезона, а и теди ше плануєм врациц на ученє – толкує Кристина.

Дараз найєдноставнєйше дочасову роботу було достац прейґ младежских задруґох. Медзитим, як проблем нєзанятосци и нєдостатку роботних местох нарастал, велїм задруґи єдини вибор за тирвацше ришенє. Медзитим, так заняти нє задовольни зоз статусом и условиями хтори им понука тот способ присуства  на тарґовищу роботи.

Уж роками, Александар Раданов зоз Вербасу примушени операц ше на услуги младежскей задруґи, гоч є свидоми же вецей нє припада тей возростней катеґориї.

– Мам 41 рок и робим у „Карнексу“ прейґ  задруґи. Уж шейсц роки ме анґажую през контракти хтори ознова подписуєм на кажди штири мешаци, а цена моєй роботи 100 динари на годзину, цо менєй од минималней. Нє маме шлєбодни дзень, анї право на хорованє… Вообще нє знам як ше то шме, алє нє у позициї сом одбивац роботу анї глєдац лєпши условия, бо знам же можем себе ище очежац – гвари Александер.

Толкує же ше до задруґи приявел ище давно, кед наисце припадал ґрупи младих. Теди робел на полю, цо и найчастейши понукнуца.

– Нєшка задруґа нє тото цо дакеди була. Теди зме ше приявели же бизме през лєто заробели даєден динар скорей як цо ше врациме на студиї. Медзитим, нєшка то остатня надїя за яку-таку стаємну роботу, гоч тот контракт гоч хто може розтаргнуц без даякей окремней причини – щири Александер. 

РОБОТА У УНИЇ, ОД СЕЗОНСКОГО ПО ТИРВАЦЕ РИШЕНЄ

Лєтня пауза у школи идеални час кед мож дацо и заробиц на наднїци. Медзитим, векшина  штредньошколцох и студентох през лєто випатра волї одпочивац. Голєм так мож заключиц по тим же у сримских овоцнїкох наднїчарох нїґда досц у сезони кед ше обера овоц.

Александар, од єшенї матурант Ґимназиї „Сава Шуманович“ у Шидзе, и влонї, а и того лєта ришел заробиц свой динар. Ходзи на наднїцу до Бикичу оберац брескинї. Од Шиду по овоцнїк орґанизовани транспорт, а наднїца 1 200 динари. Александар и спортиста, так же гвари же му тота робота нє чежка, а кажди динар ше зда. Правда, на наднїцу частейше ходза старши особи хтори у транзициї остали без роботи, або аж и пензионере хтори так надополнюю нїзки пензиї. За шидску општину характеристичне и вше масовнєйше зявенє же  млади одходза робиц до державох Европскей униї, насампредз до Словацкей и Ческей, а тиж и до Нємецкей дзе ше глєда медицински роботнїки. Хто одходзи по законских предписаньох о тим посила прияву до нашей кед особа на евиденциї подобне, як и кед слово о роботним одношеню у самей Сербиї, Як дознаваме од координатора Подручней канцелариї  Националней служби за обезпечованє роботи НСЗ у Шидзе Влайка Манойловича, законски предписаня хтори реґулую таку файту роботних одношеньох ускладзени зоз домашнїм законодавством, цо значно олєгчує одход до иножемства. Як мож чуц од младих людзох хтори уж робели лєбо робя у ЕУ, велї планую тото вихасновац, и свой дочасови роботни статус споза гранїци претвориц до тирвацого.

МЛАДЕЖСКИ И СТУДЕНТСКИ ЗАДРУҐИ

Младежски або студентски задруґи би требали буц институция дзе ше млади можу явиц и поглєдац роботу. Прейґ студентскей або младежскей задруґи можу ше анґажовац млади од 15 по 30 роки, порядни студенти по 26 роки, як и старши порядни студенти до 30 роки хтори каждого року муша приношиц документ о студираню. Студентом по 26 роки за таки роботи нє идзе роботни стаж и звичайно нє маю здравствене осиґуранє, алє нєзаняти по 30 роки го маю, а роботни стаж им може буц уписани до пензийного фонду. Роботи хтори ше можу достац прейґ тих задруґох дочасово або сезонски и можу тирвац найвецей 120 днї, односно штири мешаци.

ПОВЯЗАНИ ТЕКСТИ