РУСКИ КЕРЕСТУР – Вчера, на Треци дзень Сошествия св. Духа – Русадля и наш Завитни дзень, на Архиєрейскей Служби Божей шветочно преславена и 200-рочнїца Водици, односно перших нєзвичайних указаньох Мацери Божей у водицовей студзенки 1817. року, у нєшкайшим нашим Марийовим святилїщу.
Шицких присутних и госцох на початку привитал домашнї владика, апостолски еґзарх за грекокатолїкох у Сербиї кир Георгий Джуджар, а Службу Божу предводзел крижевски владика Никола Кекич, з владиками и вецей як трицец священїками з нашого Еґзархату, з Крижевского владичества, з Еґзархату у Македониї, з Мадярскей и римокатолїцкима священїками зоз сушедних владичествох.
Євангелию читал парох старовербаски о. Алексий Гудак, Апостол дзияк новосадски Йовґен Надь, а на Служби шпивал Мишани хор Дому култури Руски Керестур и Катедралней церкви св. оца Миколая, з хторим дириґовала Лидия Пашо, а солиста бул Михайло Рамач.
Вирни мали нагоди на пейц местох приступиц до Св. тайни споведзи, цо велї и вихасновали, а попри числених домашнїх, було паломнїкох з рижних местох и крайох. Орґанизовано на автобусох допутовали з Нового Саду и його сушедних местох, з Дюрдьова и Сримскей Митровици, Коцура, на мини-бусох з Вербасу, Кули, на комбийох и приватних автох зоз Шиду и наших сримских местох, з Петровцох з Горватскей, як и з других местох.
У Водици як госци вчера були и представителє побратимених грекокатолїцких парохийох з керестурску з Кечкемету и Сеґедину, зоз своїма священїками, госци зоз Словацкей, як и вирни з Нємецкей, Канади, Австралиї.
На концу Служби владика Георгий подзековал Мариї за тот прекрасни дзень, шицким котри пришли, як и домашнїм котри пририхтали и орґанизовали тоту шветочносц.
По Служби шицки осемцме владикове присутним подзелєли благослов дару Св. духа прейґ мированя, а як памятку на тот дзень кажде достал памятни обращик Водицовей Мариї.
Вирни могли купиц и з тей нагоди видати публикациї – кнїжку, брошуру и флаєр „Водица”, як и рижни Водицово сувенири и други предмети, понеже було и шатри пре традицийни Водицов – Цапов Кирбай.
По Служби у Водици, у просторийох парохийного Каритасу у церковней порти Катедралней церкви у Керестуре домашнї за паломнїкох пририхтали окрипенє и закуску, як и полудзенок за госцох у Ресторанє „Червена ружа”.