На Уставни суд пре оцену з мацеринского

автор бва
1.6k Опатрене

Народна посланїца спред посланїцкей ґрупи ЛДП-ЛСВ-СДА Олена Папуґа гвари же ше предлужи бориц же би  оценьованє мацеринского язика при националних заєднїцох мало иншаки третман и после того як єй амандмани на вименки закона о образованю нє були прилапени на нєдавним гласаню у Народней скупштини Србиї.

Папуґова гвари же после предвидзеного законского року, такой предложи нови вименки Закону о основним образованю и на схадзкох Одбору за образованє будзе обгрунтовйовац же мацерински язик муши достац лєпши третман.

– Опитам ше Устваному суду же чи таке третированє мацеринского язика унїжованє нашого уставного права – гвари народна посланїца.

Пакет законох о образованю бул обєдинєни у єдней точки дньового шора, а найвецей дискусиї було коло дуалного образованя, так же мало було часу за амандмани на други закони, як вименки и дополнєня на Закон о основним образованю, толкує Папуґова.

Пред гласаньом у Народней скупштини, у поштреднїцтве Канцелариї за людски и меншнски права Влади Сербиї, Комисия за образованє Координациї националних совитох националних меншинох написала Предлог заувагох на пакет законох з обласци образованя и послала го народней посланїци Олени Папуґа же би го приложела ґу амандманом.

Амандмани ше одношели на двоязичну наставу и оценьованє у Закону о основней школи, як о вияшньованю родичох за двоязичну наставу и финансийну потримовку локалней самоуправи у Закону о предшколским воспитаню и образованю. 

Координация и посланїца Папуґова думаю же оценьованє мацеринского язика (як факултативного зоз елементами националней култури) треба же би було зоз оцену, а нє описно як усвоєне у вименкох закону и же би уходзело до просеку. То ключне у Закону о основним образованю, прето є меншином додатни мотив за ученє мацеринского язика.

– Опитала сом ше министрови образованя прецо то проблем же би ше мацерински язик оценьовало и же би оцена з мацеринского уходзела до просеку. Министер ми гварел же то нє ровноправно и же вец припаднїки националних меншинох маю єдну оцену вецей у школярских кнїжочкох – гварела посланїца ґрупи ЛДП-ЛСВ-СДА.

Папуґова предложела же би шицки школяре, як то скорей було, учели язик дружтвеного штредку, зоз чим би шицки, вец, мали исте число оценох.

Союз войводянских Мадярох, котри у владаюцей коалициї, мал свойо амандмани котри були прилапени и нє потримал Предлог заувагох на пакет законох з обласци образованя котри дала Координация националних совитох националних меншинох у поштреднїцтве Канцелариї за людски и меншнски права Влади Сербиї.

КООРДИНАЦИЯ БЕЗ УПЛЇВУ?

Союз войводянских Мадярох, котри у владаюцей коалициї, мал свойо амандмани котри були прилапени и нє потримал Предлог заувагох на пакет законох з обласци образованя котри дала Координация националних совитох националних меншинох у поштреднїцтве Канцелариї за людски и меншнски права Влади Сербиї.

Олена Папуґа ше пита чи наисце нїхто нє мал слуха за амандмани Координациї националних совитох националних меншинох, котра би требала буц поштреднїк медзи националнима заєднїцами и державу, и чи вона нє ма нїяку моц же би вилобирала закони, або амандмани котри предложи.

ПОВЯЗАНИ ТЕКСТИ