ЛУЗИЯНА (ЗАД) – Талантовани млади пиянист Дарко Варґа з Бачкей Тополї початком мая закончел Докторски студиї клавира на ЛСУ Школи за музику у Лузияни у Зєдинєних америцких державох.
Школованє Варґа почал у Бачкей Тополї дзе закончел нїзшу и штредню музичну школу, а музичну академию – напрям клавир у Беоґрадзе 2010. року. Усовершовал ше при визначних професорох и наступал з реномованима оркестрами у велїх городох Сербиї, у Горватскей, Мадярскей, Италиї, Белґиї, України, Ческей и ЗАД.
Освойовал найвисши награди на велїх державних и иножемних змаганьох, а од 2012. року школованє предлужел у Америки дзе мастер зоз клавира закончел на Флориди 2014. року дзе робел и як асистент, а бул анґажовани и на других проєктох. Активни є и як камерни музичар у рижних ансамблох, наступал и з визначнима оперскима шпивачами, а под час докторских студийох у Лузияни тиж є анґажовани и як асистент.
Дарко познати и у нашей заєднїци кед ище як штредньошколєц и студент наступал на вецей културних подїйох.
Вецей о його биоґрафиї мож пречитац на Порталу рускей култури.