СУБОТИЦА – Перши екуменски Крачунски концерт, у орґанизациї Радио Мариї, будзе отримани нєшка у велькей сали Городскей хижи у Суботици, а на нїм будзе участвовац и Хор катедралней церкви св. оца Миколая и Дому култури з Руского Керестура.
Циль Концерту же би шицки християнє вєдно росли у єдинстве и поволали других на порозуменє и любов. На репертоарe учашнїкох буду крачунски шпиванки, а участвовац буду седем представителє римо и грекокатолїцкей Церкви, реформованей заєднїци, евагелистичней заєднїци.
Керестурски хор под руководством Лидиї Пашо ше представи зоз трома колядами, а їх одход финансує керестурска парохия.
Концерт ше будзе директно преношиц на габох Радио Мариї у Суботици и околних местох на 90,7 МHz, у Новим Садзе и околних местох на 90,0 МHz, и у Зомборе и околних местох на 95,7 МHz.