Самостойна вистава нашого познатого подобового уметнїка Владу Нярадия з Вербасу отворена 7. авґуста, у Завичайним музею у Руми. Музей 2017. року достал награду як найлєпши музей у Сербиї у конкуренциї од 106 музейох.
У рамикох традицийней манифестациї „Културне лєто”, музейски вечари, Владо Няради ше представел публики у Руми зоз свою 55. самостойну виставу и роботами з циклусу „Записи з Метеорох”. Слово о подобових роботох хтори наставали под час Нярадийових длугших нащивох Метеорох у Греческей, 2013. року, як и у його ателєу.
Виставу отворела о. д. директора Завичайного музею у Руми Бранислава Конєвич, док о самих роботох як и приповедку о тим як дїла наставали, потолковал сам автор.
Културну програму збогацела и поетеса з Нового Саду Ґордана Йович, хтора пречитала писнї зоз своєй збирки писньох „Нєбесни шведкове” (Небески сведоци), и хтора тоту збирку писньох, як и свойо други два збирки подаровала музею.
ЗНАЛ ЖЕ ТО БУДЗЕ ДОБРИ ЦИКЛУС РОБОТОХ
– Мал сом вельке жаданє пойсц и видзиц Метеори у Греческей, и кед ше тото жаданє сполнєло, знал сом же з того видзе єден добри циклус подобових роботох. Понеже ме сам мотив на тельо прицагнул и попри тим же сом направел вельке число фотоґрафийох, вжал сом и папер и клайбас и други файти фарбох, и так настали рисунки од хторих єдна часц на вистави – визначел з тей нагоди уметнїк и додал же роботи з часом дозревали з його познєйшим нащивйованьом Метеорох.
– Нє бул сом нательо импресионовани зоз самима манастирами, понеже су уж барз комерциялизовани, алє ме прицагнул каменїти пейзаж хтори випатра як кед бисце були на даякей другей планети. Фарби пейзажу нє таки цепли, алє сам випатрунок я так дожил и свойо дожица пренєсол на малюнки – гварел Няради.
ШЕЙСЦРОЧНИ ЦИКЛУС
На вистави виложени пейдзешат роботи, малюнки, рисунки и скулптури… Мож було опатриц и фотоґрафиї як то випатра на Метеорох, фарби, щеточки, часци каменя и други предмети хтори уметнїк принєсол на памятку.
Тота вистава одсликує шейсцрочни циклус Нярадийовей творчосци, як ше вон розвивал и менял. Роботи з циклусу „Записи з Метеорох” представени на вецей виставох у Сербиї и иножемстве, а самостойно су представени у рамикох Ноци музейох пред даскельома роками у Суботици и Футоґу. Вельке число роботох ше находзи и у рижних институцийох, ґалерийох и приватних збиркох по цалим швеце.
„КАРПАТСКИ МИТ”
Нярадийово сотруднїцтво зоз Завичайним музейом у Руми почало ище 1991. року, кед бул єден з учашнїкох Першого румского єшеньского салону. Самостойно викладал 2011. року, кед ше представел зоз циклусом рисункох „Хаос”.
На самим отвераню вистави Няради Музею подаровал и Мапу ґрафикох зоз циклусу „Карпатски мит” хтора була представена и на його самостойней вистави под час Националного швета Руснацох у Вербаше 2015. року.
Вистава будзе тирвац по 7. септембер.
