Чи пре очежани стан у польопривреди, чи пре нєвигодну хвилю, чи прето же би ше уж у першим кругу лицитованя „нє залєцели”, од 1 077 гектарох державней польопривредней жеми, кельо було понукнуте, вилицитоване лєм 400 гектари. Звичайно ше тоту значну роботу окончовало у сали Културно-образовного центру, медзитим, понеже нє було гужви, лицитованє отримане у сали Скупштини општини Шид.
Як нам гварел Деян Вученович, предсидатель Комисиї за лицитованє, вкупно було 148 лицитованя у 15 катастерских општинох. Нє лицитоване у катастарских општинох Сот, Люба и Илинци. За лицитованє ше приявели 30 парасти, медзитим случело ше же ше дзепоєдни на лицитованю анї нє зявели. Найвекша вилицотивана цена 72 322 динари у КО Батровци, а початна цена була 37 322 динари.
Кед ше опатри оглашку хтора пред тим була розписана за лицитованє, обачиц же углавним понукнути менши поверхносци, часто и менши од єдного гектара. У Адашевцох на приклад найвекша поверхносц була 39,7 гектари по початней цени 34 000 динари. У КО Бачинци понукнути поверхносци були менши од гектара, а подобне було и у КО Беркасово. У Батровцох тиж ше понукало мали поверхносци, найвекша 23 гектари, хтори мали найвисшу цену. Найменєй понукнутей жеми було у КО Шид, лєм єдна парцела поверхносци 2,1 гектар, по початней цени 32 307 динари.
После лицитованя, шлїдза законски формалносци и подписованє контракта о закупу жеми, а закуп тирва єден рок. Кеди будзе отримани други круг лицитованя, Деян Вученович затераз нє знаал прецизовац.