РУСКИ КЕРЕСТУР – Нєшка Треци дзень Русадльох и Завитни дзень у Марийовим святилїщу Водица коло Руского Керестура, хтора источашнє преславює и 200-рочнїцу перших нєзвичайних указаньох у тедишнєй студзенки у полю, а з хторих виросло нєшкайше святилїще. Завитни дзень почал вчера вечар з процесию з порти Катедралней церкви и Службу Божу у Водици.
Завитни дзень и Водицов ювилей нєшка буду преславени з Ахиєрейску Службу Божу на 11 годзин, хтору з домашнїм владиком Георгийом Джуджаром буду предводзиц апостолски нунций у Сербиї Лучияно Сурияни и архиепископ беоґрадски Станислав Хочевар, вєдно з другима владиками и вельким числом священїкох.
Обчекує ше приход и велького числа вирних з парохийох нашого Еґзархату и других госцох, понеже Завитни дзень источашнє по обидвох календарох.
Вчера, на предвечерє Завитного дня, процесия з церковней порти рушела на 17 годзин, участвовали у нєй коло трицец особи предводзени з крижами, як то по традициї, и капеланом о. Михайлом Шантом.
Службу Божу у Водици служел о. Шанта, а споведали капелан о. Владимир Медєши и парох о. Михайло Малацко, котри и наказовал. У казанї наглашел же нам у Водици Мария пред очми як приклад особи котра жила блаженства, и котра нас заступа и помага на животней драги спашеня.
На вчерайшей Служби у Водици було вельо вирних рижних ґенерацийох, а найвецей младши фамелиї з дзецми и заняти, котри нє можу присц на нєшкайши Завитни дзень. Попри Керестурцох, було вирних и з Коцура, Крущичу, Нового Саду, та и з Канади, а по Служби священїки мировали шицких присутних.
Уж вчера могло купиц и праве за тоту нагоду видруковане треце виданє кнїжки о. Владислава Варґу „Водица”, тиж и брошури и флаєри з нагоди ювилею Водици.