РУСКИ КЕРЕСТУР – Всоботу, 4. авґуста, з валалу випровадзени волонтере дванастого Медзинародного волонтерского кампу, орґанизатором и домашнїм остали позитивни упечатки, а шицки задовольни понеже поробене тото цо було заплановане.
Тогорочни задатки волонтерох були же би офарбели ограду коло церкви и будинку замку, єден дзень помогли у розчисцованю двора найстаршей рускей хижи и направели терен за одбойку на писку на базену.
По законченю роботох було плановане орґанизовац и турнир у одбойки, цо нажаль виостало, прето же ше орґанизатором нє удало обезпечиц средства за мрежу и лабду. По конкурсу локалней самоуправи Туристичне здруженє Руски Керестур вимагало 13 500 динари з проєктом за купованє истих, алє нажаль проєкт нє прешол на конкурсу. Затераз ше домашнї заш лєм знашли, та терен мож хасновац рекреативно, а плановани турнир у одбойки на писку би мал буц орґанизовани по конєц лєта.
Орґанизаторе кампу були Туристичне здруженє Руски Керестур и орґанизация Млади виглєдоваче Сербиї, а лидер кампу бул Деян Будински.