Орґанизация „Drop Sensei” у хторей єдни зоз матичних членох Бранимир Боянович и Борис Ройко зоз Руского Керестура, потераз успишно орґанизовали вецей як 50 музични збуваня, кельо зоз домашнїма, тельо и зоз странскима продуцентами и ди-джеями.
Мено „Drop Sensei” составене зоз двох словох, хтори маю вельке и характеристичне значенє. „Drop” у електронскей музики означує хвильку кед два писнї, и то єй главни часци руша нараз, т. є. кед „улєцує” єдна писня до другей, а „Sensei” на японским язику значи „майстор”. „Майстор дропу” означує майстра хтори може направиц микс двох писньох.
– То нє так лєгко робиц, а ми у наших наступох тото константно хаснуєме. Лєгко пущиц писню и на ню такой другу, алє найчежше потрафиц два писнї, у истей хвильки. Заш лєм, после тельо миксованя музики и после длугшого часу такей роботи, нє мушиме вельо вежбац – толкує Борис єден зоз членох орґанизациї.
КАЖДЕ СВОЙО РОБИ
Орґанизацию „Drop Sensei” попри Бранимира и Бориса, творя и Лехел Папачек, алє и два дзивки Оливера Алич и Єлена Шобич. Хлапци гваря же добре функционую прето же кажде од нїх ма свойо задатки хтори сполнює, покрити им шицки боки, од менаджерства и главних роботох, комуникациї зоз сотруднїками, водзеня сайту, до комуникациї прейґ дружтвених мрежох и самого маркетинґу.
А, вони познати и по поняцу „шуренє” и „Shuriken”.
– Ґенерално, шицки знаю цо значи саме слово „шуренє”, ми го повязали зоз енерґию котра присутна на наших збуваньох – полна сала, шицки у зною, шицко вре … Прето зме и дали мено збуваню котре упечатлїве и нєзвичайне. Досц є сирове, алє то позберало симпатиї – толкує Бранимир, єден зоз членох „Drop Sensei” и додава же „Shuriken” пришол зоз „шуреня”, прето же маю и свой упечатлїви лоґо „Shuriken” – а то оружиє хторе хасную нинджи, петокраки „Shuriken”.
Креативносц повязали зоз значеньом, и прето свой бренд „шуренє” формовали и преруцели ше на „Shuriken”, цо, як визначели, дава квалитетнєйшу и озбильнєйшу бешеду.
Їх початки вязани за диджеїнґ и електронску музику, алє тота приповедка достала ище єдну ноту, попри музики, млада орґанизация „Drop Sensei” постала и орґанизатор и промотер такей файти музики.
– Найважнєйше же зме отворели свою фирму „Drop Sensei” и єй основна дїловносц то продукция културних и музичних манифестацийох. Нє мож вецей робиц зоз ентузиязмом и зоз гобия, то шицко муши буц правно потримане. Тераз ми тоти котри ґураме „малих”, т. є. младих людзох, даваме им нагоду же би ше представели на збуваню и вец вони познєйше сами предлужую свойо. Бавиме ше и зоз „drum and bass” музику, алє то нам постава гоби, приоритет нам орґанизация збуваньох – визначує Боянович.
Витвориц ше през креативносц, технолоґию и иновацию, а тиж и прицагнуц звучни мена зоз шветовей сцени у електронскей музики – то єден зоз цильох тих перспективних леґиньох.
– Орґанизация збуваньох нам цикавша, ту єст вецей ствари котри треба одробиц, вше ше научи дацо нове. Намагаме ше нащивйовац и други фестивали, злучуєме ше зоз колеґами зоз швета, а продукция на високим уровню понеже авдио-визуелна технолоґия барз пошла далєко и можеш креирац шицко цо задумаш. Намагаме ше же би нашо збуваня нє були лєм музичаре и звук, алє и комбинация авдио-визуелних ефектох – гваря хлапци.
ПРИЦАГНУЦ „ВЕЛЬКИ” МЕНА
Потераз, орґанизация „Drop Sensei” попри домашнїх, на свойо збуваня приведла и шветово мена, та так зоз Нового Зеланду наступали „State of Мind”, зоз Лондону „The Prototypes”, „Hybrid Minds”, „Delta Heavy” и ище велї други.
– Участвовали зме и орґанизовали велї журки, цешиме ше же зме помагали и участвовали на журкох гуманитарного характеру, а того року, по першираз зме наступали и на Еґзиту. Збуванє прешло успишно и задовольни зме, а цо тиж важне, задовольни и сами орґанизаторе Фестивалу. Наш задаток бул поволац и злучиц цо вецей промотерох домашнєй „drum and bass” сцени, а нащивеносц була максимална. Того року,
орґанизаторе Еґзиту прилапели нашо предкладаня за два наступи на мейну, и шицко тото цо зме предложели за нашу бину „Cocta Beats&Bass”, як и єй саме мено. Нарок предложиме и „Shuriken” стейдж и наздаваме ше же нам ше поспиши сотруднїцтво – толкує Бане.
Од векших и значнєйших збуваньох хтори правели, то и маскенбали хтори орґанизую од 2015. року, потим їх родзени днї, тиж у форми жруки, алє и журки за Нови рок.
МУЗИКА ПРИ МЛАДИХ
У Сербиї помали ше популаризує и електронска музика, а тиж ше ю и баржей прилапює. Зоз розвойом и вельким вплївом дружтвених мрежох, вельо того мож видзиц и послухац и од дому.
– Заш лєм, вона чежше напредує за розлику од „house” лєбо „techno” музики. „Techno” сцена, нєшка, у Сербиї барз моцна, окреме у Беоґрадзе. „Drum and bass” збуваня нє вредзи часто правиц, можеме повесц же и раз мешачно то вельо. Думаме же то пре характер музики, прето же є досц швидки, и людзом досц присц на два, три годзини, витроша ше, наслухаю и засица ше за тот вечар. Но, ми ше намагаме популаризовац тоту музику при младих людзох, а звичайно то млади од 17 по 22 роки – визначую нашо млади промотере „drum” музики.
Цала їх идея почала як гоби и як витворйованє поєдинцох у музики и диджеїнґу, а преросла до професийней роботи. У тей хвильки маю штири до пейц проєкти рочнє хтори прерастаю до традицийних збуваньох. Планую злєпшовац квалитет самих збуваньох, а тиж и робиц на злєпшованю и звекшованю квалитета самого бренду.
ПЛАНИ ЗА ДАЛЄЙ
Прешлого тижня, орґанизация „Drop Sensei” нащивела и шветови „drum and bass” фестивал „Let it roll” у Ческей, а водзели тур-бус зоз публику, прето же вони їх партнере за Балкан, у смислу промоциї и потримовки.
– Шлїдуюци векши збуваня плановани за 18. авґуст на Твердинї, дзе будзе орґанизована журка „Лєтнї шиз”, як и маскенбал хтори заплановани за 28. октобер – визначує Ройко.
ОБЛЄЧИЦ ШЕ ДО „SHURIKEN”-У
Препознатлїви „Shuriken” лоґо краши и облєчиво, хторе млада екипа обдумала, та так вони предаваю и рекламни материял: маїци, качкети, окуляри за слунко, дукси, беджи, а сцу увесц, и тераз популарни хусточки хтори ше вяже прейґ устох.