Отворена вистава фотоґрафийох Михайла Лїкара

автор саб, фото вев
1.1k Опатрене

НОВИ САД – У Заводзе за културу войводянских Руснацох у Новим Садзе, вчера отворена вистава фотоґрафийох „Виртуални мости Михайла Лїкара”, а годно ю опатриц кажди роботни дзень од 10 до 15 годзин по 2. септембер.

Др Михайло Лїкар (1935) професийну кариєру препровадзел у фаху телекомуникацийох, а источашнє ше од студентских дньох занїмал и з фотоґрафию. У тей обласци давно, як стої у Каталоґу хтори провадзи виставу, давно превозишол аматерски уровень, а тиж бул анґажовани и коло орґанизованя и унапредзованя статусу фотоґрафиї и фотоґрафох у Новим Садзе и Войводини.

На вистави представени вибор Лїкарових чарно-билих фотоґрафийох од хторих велї, попри уметнїцкей, маю и документаристичну вредносц, понеже влапели и овиковичели важни моменти у наставаню модерного Нового Саду. Лїкар ше тиж занїмал и з пейзажну фотоґрафию, знїмал портрети и спортски фотоґрафиї.

Виставу реализовали Завод и Дружтво новинарох Войводини, а отворели ю предсидатель Дружтва новинарох Войводини Младен Булут, директорка Заводу за културу Анамария Ранкович, хтора визначела же то заєднїцки проєкт двох институцийох хтори нєдавно подписали Спорозуменє о сотруднїцтве и наявела же мож обчековац и други подобни подїї у домену визуалней култури.

ПОВЯЗАНИ ТЕКСТИ